Nongpoh, Nailur 15: Kiba bun ki longkmie na ka them Ri Bhoi kiba ju mad jingeh ha ha kaba iadei bad ka kam ban ioh scholarship ki khun ki la dap shisha da ka jingkmen, namar na ka liang ka Women Organization of Ri Bhoi District (WORD) kum ka kynhun ki Longkmie ym tang ba ka la shim khia ia ki jingeh bad ka la wan ruh ban kynduh wat ia u Myntri ka tnad Labour ban pan jingshai halor ki kyndon kiba hap ban pyndonkam na ka bynta ban ioh scholarship ki khynnah.
Kum ban pynkynmaw, ha ki por ba la leit noh bun ki longkmie ki ju ju nam ba ki shem jingeh ban thep kyrteng na ka bynta ban ioh scholarship bad ruh wan ban pynthymmai biang, namar haba thep kyrteng ban ioh scholarship hap ioh iaka jingai jingmynjur da u Government Contractor bad ruh ba hap ban dei u First Class Contractor ba bun ki longkmie ki kynduh jingeh shisha.
Ia kane la sakhi ruh ba bun ki longkmie ki la pynpaw ia la ka jingshem jongki, ba ki mad jingeh shisha haba thep ban ioh scholarship ki khun, namar la bun kita ki kyndon kiba bun jaid bad khamtam ka shem jingeh ia ki ban ia kynduh ia kita ki Government Contractor ne ki First Class Contractor.
Dei halor kine ki jingeh ba kiba bun ki Longkmie ki la pynpaw ha khmat katei ka kynhun ki Seng longkmie na Ri Bhoi, kum ki nongialam ki la leit ban kynduh ia u Myntri ka tnad Labour bad ruh ki la ioh lyngba ka Notification ba mynta kito kiba thep ban ioh scholarship kim donkam shuh ia kita ki Government Contractor lane ki First Class Contractor.
Peit ruh:
Na ka liang ka WORD mynta ka sngi ki la pynlong ia ka jingialang ha Dorbar Hall Sajer Nongpoh, ha kaba ka President ka Kong Merijune Myrsing ka la pynshai sha ki Longkmie ba ia mynta haba ki thep kyteng ban ioh scholarship ki lah ban ioh tang ia ka jingai jingmynjur na ki dhot ka VEC, Gramsevak bad BDO bad kim da donkam shuh na kita ki Contractor.
[…] Pule ruh:Pynshai Ka WORD Ïaki Longkmie Ri Bhoi Halor Ki Jingdonkam Haba Thep Scholarship Ïaki Khun […]