Shillong, Nailur 15: U nongialam ka Meghalaya Bharatiya Janata Party (BJP) u Bah AL Hek ula ong ba ki mat jingdawa ba la dawa da ka United Democratic Party (UDP) kidei ki juh hi ki mat jingdawa jong ki paidbah ka Jylla kiba wat ka BJP ruh ka dawa naka Sorkar Pdeng ban pynurlong.
Ia kane u Bah Hek ula kren halor ka jingdawa ka UDP naka Sorkar Pdeng ba ialam daka BJP bad kata ka long ban ai jingithuh noh iaka ktien Khasi haka khynrit ba phra jong ka riti synshar ka ri India, ban ai jingmynjur iaka MRSSA, ban wanrah jingpynkylla haka ain tih dewïong bad ban pynkynriah iaki briew ba sah ha Them Iew Mawlong nalor kiwei kiwei de ki mat.
Haba kren shaki lad pathai khubor u Bah Hek ula ong ba ka ktien Khasi kadei ka mat kaba suk ban pynurlong namar ia kane ka mat donkam satang ban rah haka jingialang kynhun Myntri Sorkar Pdeng bad sha Parliament bad ka BJP kaba don bun paid kam don jingeh ban ai jingmynjur.
U Bah Hek ula ong ruh ba kam don jingeh ruh ban pyntreikam iaka ain MRSSA ban tehlakam iaka jingwanrung beain ki briew shapoh ka Jylla Meghalaya.
Pule ruh: Byrnihat Police Intensify Traffic Checks Along NH-6https://meghalayapost.news/news/byrnihat-police-intensify-traffic-checks-along-nh-6-10016816.html
Haba kylli halor ka jingthmu ban pynkynriah iaki briew ba sah ha Them Iew Mawlong, u nongialam ka BJP ula ong ba kane ka jingdawa kadei naduh ki por jong ka Sorkar ba ialam da u Dr Mukul Sangma kum u Myntri Rangbah.
“Naduh ka por jong u Dr Mukul nga la kren halor kane bad hadien ba wan u Conrad K Sangma ruh nga la kren halor kane ba dei ban pynkynriah noh iaki nongtrei Sorkar kiba sah ha Them Iew Mawlong shaki jaka sah (Quarter) jong ki tnat treikam Sorkar” la ong u Bah Hek.
Peit ruh:
Hab iadei bad ka ain dewïong u Bah Hek ula ong ba iaka ba mynta um pat kwah ban kren eiei namar ka mat ka don ha Iingbishar.
