Mawkyrwat, Nailur 19: Ba la jynjynar bad syrtok palat ki paidbah ha ka leit ka wan na ka jingsniew jong ka suork, ka Seng Samla Hima Langrin (SSHL) mynta ka sngi haka jingïalam u Bah Pynshailang Lyngdoh ka la pynlong syndon da ka jingïalang paidbah ha ka Shnong Phlangdiloin ban dawa syndon na ka sorkar jylla bad na u MLA ba dei ban siang rong noh shi syndon ïa ka surok ba pynïasoh na Wahkaji Phlangdiloin shaduh sha Lapang ba hap ha South West Khasi Hills District.
Ha kane ka sngi ki la dawa ruh ban pyntrei noh ïa ka surok na Langpa ba pynïasoh sha Ranikor bad sha Phlangdiloin.
Haba kren ha kane ka jingïalang paidbah, u Bah Pynshailang Lyngdoh u la ther tyngeh ba ka sorkar ka la leh meinah sha bapalat ïa katei ka surok kaba la kot mynta la 50 snem ei ei ba la shu iehnoh shrah naduh ba la pyntrei ïa kane ka surok na Wahkaji sha Phlangdiloin ha kaba wat lada kane ka Hima ka dei kawei na ka Hima ba ka sorkar ka ioh lum bun bha ki khajna.
Shuh shuh, u la ong ruh ba ka Seng Samla Hima Langrin ka la shim ruh da ka rai ban ai por tang 6 bnai ïa ka sorkar jylla ban siang rong noh ïa ka suork na Wahkaji Phlangdiloin shaduh sha Langpa bad lada ka sorkar jylal ka leh mynthi ïa kane ka jingdawa na ka liang ka Seng Samla Hima Langrin kan ujor syndon da ka PIL sha ka ïingkashari pyrshah ïa ka sorkar jylla.
Peit ruh:
Shuh shuh, na ka liang u Bah Pynshailang Lyngdoh u la kynthoh tyngeh ruh ïa ka sorkar ba ka kmen eh tang ban ioh lum khajna na kane ka Hima bad kaba sngewsih pat ka long ba kam shym la phai khmat ban ai ïa ka roi ka par ha kaba ki paidbah katei ka dong bad ka thain ki la im jynjar mynta la 50 snem ei ei na ka jingsniew bad ka jingkhoruh khoram ka surok kaba ym pat siang rong haduh kine ki sngi.
