Nongpoh, Naitung 28: Kum kawei ka seng kaba peit kyrpang na ka bynta ki paidbah ka Ri Bhoi bad ha ka jylla hi baroh kawei, ka Ri-Bhoi Youth Federation (RBYF), sengkmie mynta ka sngi ka la lum da ka executive committee ba kyrpang na ka bynta ban ia kren na ia tai kyrpang halor ka jingai bhah ka sorkar ia u khaw rashon bad ruh ka jingbym lah ka sorkar haduh mynta ban lum ka Khana Samari kaba naduh u snem 2011.
Haba kren ne pyntip halor katei ka rai jong ka executive committee ka seng, u President ka RBYF u Bah Bipul Thangkhiew u la ong ba seng ka sngewkhia ba ka sorkar haduh mynta kam pat lah ban lum ia ka khana samari kaba dei naduh u snem 2011, ha kaba ha ka jingshisha ka dei ban don man la ka 10 snem katkum ka Socio Economic Census lane kata ka jinglum khana samari ba thymmai.
U la ong ruh hadien ba ka sorkar kmie ka la pyntreikam ia ka National Food Security Act, 2013, ka la long shisha ka jingmyntoi ia kiba bun ki longïing ba ka jingsam ia u khaw rashon la bha ha ki lai bynta kata ba kynthup ia ka Card Non-PHH, PHH bad AAY.
“Ka seng ka sngewkhia ruh ba naduh u snem u 2011 bun ki longing ki la ioh jingmyntoi na u khaw rashon hadien ba la pyntreikam ia ka ain bad hadien ba la leh ia ka Bio-Metric bun ruh kiba la khlad ki dei ban pyntip sha u DC Supply katba haduh mynta kam pat don kano kano ka jingpynrung kyrteng thymmai” ong u Bah Bipul Thangkhiew.
U Bah Bipul u la ong ruh ba ka sorkar kam dei ban shu khein jingkhein tang ia kiba la iap noh hynrei ka dei ruh ban iohi iakiba dang mih thymmai namar ban shu khein jingkhein tang ia kiba la iap ka long kaei kaei ka bym lah ban pdiang hynrei dei ban pynrung ruh ïa kiba dang thymmai bad ki bym don haka list bad khana samari jong u snem 2011 bad ka seng kala dawa ruh ba watla ki don kiba la khlad noh ka shnong ka dei ban ioh ka juh ka bhah ym ban pynduna khnang ba yn lah pat ban sam sha kiwei ki longiing.
U la ong ruh ba lehse ia mynta ka sorkar ka lah ban aidaw ba kam pat leh ïaka khana samari kaba thymmai bad lada ka long kumta ka sorkar kam dei ban pynduh iaka hok jong kito ki longiing kiba ki dkhot naka iing jong ki, kila khlad noh namar ba ym pat lah ban leh iaka khana samari kaba thymmai, namar lada ka sorkar ka lah ban pynduh ïa kiba la khlad noh, ka dei ruh ban ai ïakiba dang kha bad dang mih iing thymmai.
Namar kata naka liang ka seng kala kyrpad na u DC ka Ri-Bhoi ba u dei ban shimkhia ia kane ka kam bad kum ka seng kan sa leit ruh ban buh daka jingthoh lashai ka sngi ha kaba iadei bad kane ka phang bad khamtam ba un shimkhia mardor ia kane ka bynta naka bynta ka jingmyntoi jong ki paidbah khamtam ki longiing ba duk ba rangli.
