Nongpoh, Nailur 23: Da ka jingbitar ki paidbah ka thain Killing kiba la kot da ki hajar ngut mynta ka sngi ym tang ba ki la pynlong ia ka jingialang ban pynrem halor ka jingshah tuklar ki khyndew ki shyiap jong ka Meghalaya ha ki shnong ba hap ha ka thain Killing, hynrei ki paidbah ha kane ka sngi ki la thang ding ruh ia ka tyngshop jong u Jitul Deka ban pynrem jur halor ka jingmushlia jong u ia ki khyndew ki shyiap jong ka Meghalaya.
Ia kane ka jingialang paidbah la pynlong da ka All Killing Dorbar Committee ha Madan Killing Jorbil, ha kaba la poi da ki hajar ngut ki nongshnong shnong ki shnong kiba hap ha katei ka thain Killing bad nalor ki nongshong shnong la shim bynta ruh da ki nongmihkhmat paidbah bad ki nongialam bapher bapher.
Ki nongmihkhmat bad ki nongialam kiba la shim bynta ha kane ka jingialang paidbah ki kynthup naduh u Bah Sosthenes Sohtun MLA ka Jirang bad uba dei ruh u Myntri ba peit ia ka tnat C&RD, u Bah Charles Marngar MLA ka Mawhati, u Bah Damanbait Lamare MLA ka Umroi, ka kong Rona Khymdeit MDC ka Nongpoh, u Bah Ngaitlang Dhar, MLA barim ka Umroi, u Syiem Raid Marwet u Paiem Ken Syiem, ki Nongmihkmat na ka Hima Mylliem, ki Nongialam Shnong bad kynthup ki nongialam na ka RBYF bad na ka seng FKJGP na Ri Bhoi District.
Kane ka jingiakhih bad ka jingkhih win ki paidbah bad ki nongialam, ka dei ruh tang hadien ba la mih ka kaiphod ka Central Empowered Committee ka ban sa phah ia ka kaiphodsha ka ïingbishar ba haklieh duh ka ri, kaba dei na ka jingujor Jitul Deka na Assa m pyrshah ia ki kam pynjot mariang ban sa shah ktah ki jaka ki puta bad kynthup ia ka University of Science and Technology kaba hap ban siew haduh 150 klur, ba la pynpaw ba ka wan shna ia katei ka skulbah ha kata ka Recorded Forest.
Ha kane ka jingialang ki paidbah ki la rah ruh ia ki placard bad ki Banner pyrshah ia u Jitul Deka bad ryngkat ki jingthoh ban pynrem jur, halor ka jingkynnoh ba u la wan mushlia wat ia ki jaka ki puta jong ka jylla Meghalaya, da kaba ai daw ba ka jingshlei um sha Guwhati ka dei na ka jingpynjot mariang bad ka Ktah ia ka Assam.
Haba shim ia ka jingkren kyllum kitei ki nongialam, ka sur kaba mih ba ki pynrem jur ia u Jitul Deka uba la wan ban mushlia ia ki jaka ki puta ka Meghalaya haduh ban da ujor sha ka ïingkashari ba hakhlieh duh ka ri. Naduh ki nongialam shnong, ki nongialam seng bhalang bad kitei ki nongmihkhmat ki la shim ia ka rai ba kin pyrsha jur beit ia kane ka jingwan mushli ia ki jaka ki puta ka Meghalaya bad kin ia don ryngkat ban ia khun pyrshah ia kane ka kam ryngkat ka sorkar jylla.
Na ka liang u Bah Sosthenes Sohtun kum u MLA bad myntri sorkar, u la ong ba ma u ruh kum u nongmihkhmat u pyrshah jur ia kane ka jingtuklar u Jitul Deka bad halor kane ka kam u la dep ban ia kren shaduh u Myntri rangbah ka jylla u Conrad . K Sangma bad ia u Symbut Myntri rangbah ka jylla u Bah Prestone Tynsong, ha kaba ka sorkar mynta ka la pynkhreh ban ia khun pyrshah bad la buh ruh ia kita ki kynhun legal expert ban ia khun sha ka ïingbishar ba hakhlieh duh ka ri.
