Nongpoh, Nohprah 11: Hadien ka jingshah kyntait ia ka ticket kum u kyrtong ka NPP na Jirang Constituency, u Bah Victor Rani MDC ka Jirang, uba dei na ka party NPP mynta ka sngi u la leit ban pyniasoh noh sha ka party Congress na ka bynta ban pan ticket na ka congress ban ia khun ha kane ka election MDC 2025 na Jirang Constituency.
U Bah Victor Rani, MDC ka NPP mynta ka sngi ula pyniasoh sha ka party Congress ryngkat kiwei ki nongialam, kiba la pynpaw ba ki sngewkhia halor ka jingshah pynduh ticket kum u Sitting MDC na Jirang Constituency.
Ha kane ka jingialang ba u MDC ka NPP na Jirang ryngkat kiwei ki la pyniasoh sha ka Congress party la pynlong ha phyllaw ka Dorbar Hall Byrnihat Proper, ha kaba la don ryngkat naduh u President ka Ri Bhoi District Congress Committee u Bah M.G Kharshanlor, u Vice President u Bah Rocky A. Marwein, u Bah Phrangsngi Syngkli, President ka Jirang block Committee, u Bah Ardrian Chyne Mylliemngap, u President ka MPYC lem bad kiwei kiwei ki nongialam ka Congress bad da ki spah ngut ki nongkyrshan kiba la ai k jingkyrshan ia u Bah Victor Rani kum u MDC uba la shah pynduh ticket ha ka party NPP na Jirang Constituency.
Haba kren ha kane ka jingialang kaba u la wan ban pyniasoh sha ka Party Congress, u Bah Victor Rani u la ong, ba ha ka jingshisha u la jop na ka party Congress kum u MDC ha u snem 2014 na Jirang Constituency bad ka jingmih noh jong u ban pyniasoh sha ka NPP ka dei hadien ka jingmih ka ain ban khang bam ar maloi bad ruh ka jingshah pynduh bor ia ka iktiar ki rangbah shnong ha ki snem 2016, ba u Bah P.N Syiem kum u CEM ka KHADC u la shah sospon ha ka MPPC ha ka jinglong myntri rangbah u Dr. Mukul Sanga ba la synshar da ka seng Congress.
U la ong ruh ha kitei ki snem, u Bah P.N Syiem u la seng noh da kawei ka party ba la tip kum ka People Democratic Front (PDF) ryngkat kiwei ki para MDC, kaba dei hadien ka jingshah sospon ha ka party Congress bad wat la katta ruh na ka liang u Bah Victor Rani um shym la pyniasoh sha ka PDF bad u la shu ai tang ka jingkyrshan.
U la ong ruh ka daw kaba la pynlong ruh ia u ban mih na ka party Congress ha u snem 2008, ka dei ka jingshah pynduh ticket u Bah J.D Rymbai ha ka party Congress, kaba u Bah J.D Rymbai u la iakhun na ka UDP, kaba la pynlong ruh ia u ban mih na ka Congress bad ban kyrshan ia u Bah J.D Rymbai uba la jop don burom ha ka election 2028.
“ Dei ha u snem 2018 ba la mih ka kynrum ka kynram hapoh ka party Congress, ba u la shim ruh ia ka rai ban pyniasoh noh sha ka NPP ban kyrshan ia u Bah Sosthnes Sohtun, kaba u la jop ha ka election MLA kum u MLA ka Jirang Constituency bad kumjuh ruh ha u snem 2023 u la jop biang kum u MLA na Jirang bad ka long pat kaba sngewsih ba mynta kum u Sitting MDC u la shah pynduh tiket kylla khlem da burom ba ki paidbah ki la pynjop ia u kum u MDC na Jirang Constituency” ong u Bah Victor Rani.
Shuh shuh u la ong ruh ka dawbah kaba u la hap ban phet noh na ka party NPP kam dei satia tang kitei ki daw, hynrei ki nongialam ka party NPP ryngkat u MLA ka Jirang, ki la pynsniew dur ia u, da kaba pynshoi sha ki nongialam ka State NPP kaba dei lyngba ka jingiasuhbuit ban pynduh ticket noh ia u kum u Sitting MDC na Jirang Constituency ban ia khun ha kane ka election MDC na Jirnag Constituency.
Ha kawei ka bynta, u la pynpaw ruh ba kane ka jingpyniasoh sha ka Congress ka long ban iatrei rygnkat bad ka Congress, ha kaba lada ka party Congress kan ai ia ka ticket un mih shakhmat ban ia khun ha kane ka election MDC bad kata ruh ka shong ha ka jingbishar bniah ka party Congress, u la bynrap shuh shuh.
