Nongpoh, Nohprah 10: Ka long shisha ka jingkmen kaba khraw ia ki spah tylli ki shnong ba hap ha ka thain Umden ha Ri Bhoi, ha kaba mynta ka sngi u Symbut Myntri ka sorkar bad uba dei ruh u Myntri ka tnad PWD u Bah Prestone Tynsong, da lade u la leit ban buh mawnongrim na ka bynta ban siang rong noh ia kane ka surok kaba la shah iehnoh bein la bun phew snem mynta bad kaba hap hapoh ka Nongpoh Constituency.
Ia kane ka jingbuh maw nongrim la pynlong ha Madan ialehkai ka shnong Umden, ha kaba da ki hajar ki paidbah ki la wan ban sakhi bad ba la don lang naduh u Bah Mayral Born Syiem, MLA ka Nongpoh u Dr. Celestine Lyngdoh MLA ka Umsning, u Deputy Commissioner ka Ri Bhoi, u Abhilash Baranwal, u SP ka Ri Bhoi, u VS. Rathore, u CE ka tnad PWD road u Bah D. Langstang, u CE ka PMGSY u Bah Andrew Umdor bad kynthup kiwei kiwei ki riew pawkhmat na ka Nongpoh Constituency.
Haba kren ha kane ka sngi, u Bah Prestone Tynsong, u la ai khublei ia ki paidbah kiba la wan ban sakhi halor kane ka jingbuh maw nongrim ban siang rong ia kane ka surok bad ha kawei ka bynta u la kren shai ruh ba halor kane ka jingbuh mawnongrim kin sa don kiba leh drama ne kynthoh bad wat la katta ruh kum u myntri sorkar un nym sngap bad ba la mlien bad rben ka snienoh, ha kaba ka kamram ka long ym ban shu kren tang da ka ktein bad hap ban pyni da ka kam ba ki paidbah kin bishar ia ka kam ba la leh da kane ka sorkar.
U la kren shai ruh ba hadien kane ka jingbuh ia u mawnongrim, kin sa sdang noh ia ka kam ban siang rong ia kane ka surok, kata ka surok na Nongpoh- Umden ba la mang da ka State Plan ha ka jinglut kaba la kot sha ka T. 49 klur bad kumjuh ruh na Umden sha Sonapur ban mih sha Byrnihat ba la mang da ka PMGSY ha ka jinglut kaba la kot sha ka T. 47 klur tam.
U la kren shai ruh ban kynthoh ne kren tang da ka ktien ka long shisha kaba suk bad ban leh ia ka kam ka long kaba eh. Ha kaba bun ha kine ki sngi ki shu kren ieit jaid bynriew tang ha ka ktien bad lada ym leh da ka kam kan ym myntoi ban ong ba ieit jaid bynriew, ha kaba ka jingieit jaid bynriew kan sdang noh shuwa na la rympei bad bun pat kiba pyrta ieit jaid bynriew tang ha surok khlem pat da lah ban ieid na la rympei.
U la ong ruh ka sorkar ka la ialeh katba lah ban thaw ia ki lad ki lynti khamtam ha kaba ia dei bad ki surok na ka bynta ban wan rah ia ka jingkylla bad lada lah shisha ban pynurlong kumba la mang tyngka kan sa wan shisha kata ka jingkylla hapoh ka jylla.
Haba kren halor ka mang tyngka na ka bynta ki surok ha ka jylla, u Bah Prestone Tynsong u la ïathuh lyngba ka State plan ka sorkara ka la mang haduh 1100 klur, na ka PMGSY 1100 klur, 400 klur lyngba ka CIRF, 140 klur lyngba ka RIDF bad 2000 klur lyngba ka World Bank, ha kaba ka jingthmu ne ka jingangnjud ka sorkar ka long shisha ban wan rah ia ka jingkylla bad ka long pat kaba sngewsih ba bun ki paidbah kim ju da bishar ne wad bniah bad ki shu kloi tang ban kynthoh ne bein khlem da tip ia ka jingshisha.
