Nongpoh, Nohprah 16: Shwa ban kynjoh na ka bynta ban rakhe ne lehkmen ia ka Christmas, kaba ngi ngeit ia kata ka jingwan long briew u khun u Blei sha kane ka pyrthei, ka HNYF Women’s Wing na ka seng kmie ryngkat ka jingiatrei lang bad ka HNYF Women’s Wing, 20mer Circle mynta ka sngi ki la pynlong da ka jingai sngewbha ia ki jain syiad sha ki longïing baduk kum ka jingai sngewbha Christmas bad snem thymmai ba la jied kyrpang na ki shnong bapher bapher ha ka thain 20mer ha Ri Bhoi.
Ia kane ka jingsam ia ki jaid syaid, la pynlong ha Dorbar Hall ka Shnong Pahammawlein, ha kaba la sakhi da ka jingdon lang ka General Secretary ka HNYF Women’s Wing, ka Kong Phrinsibon Kharmuti; u President ka HNYF Northern Region, u Bah Hesting Lyngdoh; u Vice president ka HNYF sengkmie, u Bah Barnabas Manih, ka President ka HNYF Women’s Wing 20mer Circle, ka Kong Doramon Syngkli, u Rangbah Shnong ka Pahammawlein, u Bah K. Syngkli, bad kynthup 25 ngut ki longïing baduk ba la ioh pdiang ia kane ka jingai sngewbha ka seng kum ka jingai sngewbha Christmas bad snem thymmai.
Kumba la pynpaw naduh ka General Secretary ka HNYF Sengkmie, ka Kong Phrinsibon Kharmuti bad u Bah Hesting Lyngdoh, President ka HNYF Northern Region, ki la ong ba kane ka jingai sngewbha ia ki jaiñ syaid ka long shi bynta ban ia don bynta lang bad ki longïing baduk ha kane ka jingrkhe ia ka Christmas bad u snem thymmai bad kane ka jingai sngewbha ka long barit bad ka dei pat ka jingangnud ka seng ban phai khmat sha ki longïing baduk ha ka imlang ka sahlang.
Shuh shuh, ki la bynrap ruh da kaba ong, ba ka seng HNYF kan dang iai bteng ban shakri bad ban phai khmat kyrpang sha ki longïing baduk ha ka imlang ka sahlang bad kum ka seng ka don ruh ia ka angnud ban shakri na ka bynta ban peit lem ia ka eh ka shong jong ka imlang ka sahlang la ka long ha kano kano ka bynta jong ka jingshakri ban phai khmat sha ki paradoh ki parasnam, ki la bynrap.
