U Jay Shah, Honorary Secretary jong ka Board of Control for Cricket in India (BCCI) ha ka janmiet jong ka Sngi U Blei, u la pynbna syndon da ka song pisa kaba haduh T. 125 klur sha ka kynhun ialehkai cricket jong ka ri, hadien ba ka la ioh ban rah ia ka nam lah jong ka World Cup T20 kaba la pynlong ha Kingston Oval jong ka ri Barbados.
Kum ban shu pyntip, ka kynhun ialehkai jong ka ri India, kaba la ialam da u Rohit Sharma kum u kapten ka la ioh ban khur ia katei ka namjop hadien ba ka lah ban pynliem noh ia ka kynhun ialehkai jong ka ri South Africa da 7 run.
Kane ka jingjop jong ka kynhun ialehkai, kadei ruh hadien shiphew snem lynter ba ka kynhun ialehkai jong ka ri, kam shym la ioh ruh ban rah ia ka nam lahduh ha ki lympung ialehkai kiba heh, kiba la pynlong da ka International Cricket Council (ICC).
U Jay Shah u la pynbna paidbah ia kane ka song pisa, kaba long kum ka khusnam sha ka kynhun ialehkai kriket jong ka ri lyngba ka rynsan X ha kaba u la thoh “Nga sngewkmen ban pynbna ia ka khusnam pisa kaba T. 125 klur na ka bynta ka kynhun ialehkai jong ka ri India halor ka jingjop ka jongka iaka ICC Men’s T20 World Cup 2024. Ka kynhun ka la pyni ia ka sap kaba kyrpang, ka jingkut jingmut, bad ka jingtbit ha ka jingialehkai ha baroh kawei ka lympung. Khublei shibun ia baroh ki nongialehkai, ki coach, bad ki nongkyrshan na ka bynta kane ka jingjop kaba donburom”.
