Nongpoh, Iaïong 15: Ka la long ka jingai mynsiem ia ka ophis u District Sport Officer ka Ri Bhoi ha kaba mynta u snem haduh 36 tylli ki skul na kylleng ka dong Ri Bhoi ki la wan shim bynta ha ka lymgpung ialehkai sport ba la tip kum ka District Level Inter School Athletic Meet 2025 ba la pynlong ha madan NSCA Pahamsyiem.
Kane ka lympung ka dei kaba la pynlong haduh 3 sngi lynter kaba la sdang mynta ka sngi ha ka jingiatrei ryngkat ruh ka Athletic Committee ka Ri Bhoi District Sport Association bad ha ka jingplie paidbah ia kane ka lympung la wan ban plie paidbah da u Bah Eric Dkhar, BDO ka Umling C&RD Block kum u kongsan bad u Bah RB Shadap President ka Ri Bhoi District Sports Association kum u symbud kongsan.
La sakhi lang ruh ha kane k asngi da ka jingdon lang u Bah Boby L Nongbet, District Sports Officer, Ri Bhoi District, ki principal, ki nonghikai bad ki khynnah skul kiba la shimbynta shitrhem ha kane ka sngi sdang kane ka lympung ialehkai sport ki khynnah skul ha Ri Bhoi.
La ioh lum jingtip ruh haduh 901 ngut ki samla kynthei bad shynrang na ki skul bapher bapher kin ia shim bynta ha kane ka lympung ban ai aireng ha ki jingialehkai bapher bapher hapoh kane ka 3 sngi.
Haba kren ha kane ka sngi, na ka liang u Bah Eric DKhar kum u kongsan u la ai mynsiem ia ki khynnah ba kin shim bynta shitrhem ha kane ka lympung bad ha kajuh ka por u ai khublei ruh ia ka ophis u District Sport Officer kaba la shim khia ban pynlong ia kane ka lympung ba ki khynnah skul kin ioh ia ka lad ban sei madan ia ki sap ki phong ha ki kam ialehkai sport nalor ka jingpule jong ki.
Shuh shuh, u la kyntu ruh ia ki khynnah ba kin pyndonkam hok ia ka sap kaba ki don ha ki jingialehkai sport bad kyrmen skhem ba kin mih ki khlur ialehkai spor na kane ka them Ri Bhoi kaba long ka burom ym tang ia ka District bad ia ka jylla hi baroh kawei.
