Ki seng bapher bapher jong ka jngohkai pyrthei jong ka jylla Meghalaya mynta ka sngi ki la pynrem jur ia ka seng Hynniewtrep National Youth Front (HNYF) halor ka ka jingpynsangeh bad phah phai noh ia baroh ki nongjngohkai pyrthei kiba thmu ban leit sha ki bynta bapher bapher jong ka thaiñ Sohra bad Dawki.
Kine ki seng ki kynthup ka Tourism Operators Association of Meghalaya, ka Federation Shillong Hotels, ka Meghalaya Rural Tourism Forum, ka Tour Guide Operator Association of Meghalaya, ka Meghalaya Tourist Development Forum, ka Tour Guide Association jong ka Jylla Meghalaya nalor kiba bun kiwei pat.
Haba kren sha ki lad pathai khubor, u president jong ka Tourism Operators Association of Meghalaya u Bah Banlum Blah u la ong ba ka seng kan sa thoh sha u Myntri ba dei peit ia ka tnad jngohkai pyrthei ban ai jingtip lyngkot halor katei ka jingjia kaba sngewsih bad ban dawa tyngeh pyrshah ia kum kine ki riew shimet kiba pyrshang ban buh jingma ia ka kam jngohkai pyrthei jong ka jylla.
U Bah Banlum u la pyntip ba hadien ki jingjia ba sngewsih, ki seng bapher bapher jong ka jngohkai pyrthei jong ka jylla Meghalaya ki la khot ia ka jingialang kaba kyrkieh ban iakren halor katei ka jingjia.
“Ka la long ka jinglyngngoh ym tang ïa ki nongwan jngohkai pyrthei hynrei ka la long ruh ka jingkyndit kaba khraw ïa ngi namar ha ka sien kaba nyngkong ba ngi ïohsngew ba ki nongjngohkai pyrthei ki shah pynsangeh bad phah biang sha ki jaka ba ki leit” ong u Banlum.
U Bah Banlum u la ong ba ka la shim por da ki snem bad ki snem ia baroh ki nongshim bynta ha ka jylla ban tei ia ka jingwan jngohkai pyrthei kaba ka jylla ka don ha kane ka por.
U la bynrap ruh ba ka kam jngohkai pyrthei ka dei kawei na ki kam kaba heh bha ha ka jylla Meghalaya kaba la ai jingmyntoi ïa ki spah ngut ki samla khamtam mynta haba ka kam jngohkai pyrthei ka la kiew wat sha ki jaka nongkyndong jong ka jylla.
