Jowai, Jymmang 23: Namar ka jingma kaba ap ia ka imlang sahlang namar ka jingnang kynrei jong ki nongshalan bad nongdih Drok ha ka thaiñ East Jaintia Hills District, na ka liang ka kynhun jong ka Jaintia National Council (JNC) ka la buh ia ka jingkyrpad ia ka sorkar jylla ba kan shim ia ki lad kiba tyngeh ban pynduhjait noh ia u Drok na kane ka thaiñ.
Ia kane la pynpaw da ki nongialam ka JNC, lyngba u Working President u Bah Symboh Baiar Sumer, hadien ba ka seng ka la ioh ban kem ia arngut ki nongdih Drok kiba la phla hok ia ka jingdon jong ki nongkhaii Drok bad kiba pyndonkam ia u ne u jingdih buaid ba shyrkhei.
U Bah Sumer u la iathuh ruh, ba na ka liang ka seng ka la aiti noh ia kine ki arngut kiba la kem sha ki bahaiing hasem jong ki ha ryngkat ka sneng ka kraw bad la kyntu ia ki ba kin kiar noh na kine ki jingmlien ba sniew.
U la ong ruh, ba ka seng hi ka dap da ka jingsngewkhia kaba jur halor ka jingnang kynrei jong u Drok ha kane ka thain kaba la buh jingma shikatdei ia ka lawei jong ki khun samla kumjuh ia ka imlang sahlang namar ka jingnang jur ruh ki kam sniew kiba har rukom.
Kumta, na ka liang ka seng ka la kyrpad jur na ki bor ba dei peit jong ka sorkar jylla ba kan thaw ia ki lad ki lynti kumno ban pynduh jait noh ia u Drok na kane ka thaiñ ban iada ia ka lawei jong ki khun samla, da kaba bynrap ruh, ba ka seng kan nang bteng ban peitngor ia ka iaid ka ieng jong ki nongdih bad nongshalan Drok ha kane ka thaiñ.
