Nongpoh, Nohprah 09: U Bah Sosthenes Sohtun, MLA Jirang mynta ka sngi, u la leit ban plie paidbah ia artylli ki skkul building ba thymmai, ia kaba u la pynioh hapoh ka shnong Maikhuli bad Pillangkata, kiba dei ruh ki shnong kiba don ha khappud ka Meghalaya bad Assam.
Kitei ki artylli ki skul building, kiba dei na bynta ba shnong jong kito ki khynnah kiba pule ha ka kyrdan Lower Primary, ha kaba ia ka skul building ha shnong Pilliangkata, la tei ha ka jinglut kaba kot sha ka T. 50 lak, katba ia ka skul building kaba la tei ha Maikhuli, ka dei kaba la tei ha ka jinglut kaba la kot sha ka T. 37 lak.
Haba plie paidbah ia kitei ki skul building, nalor ka jingdon u MLA, la sakhi da ka jingdon ki briew na ka tnat pule puthi, ki nongialam shnong, ki riew rangbah lem bad paidbah ha kitei ki shnong.
Haba iadei bad katei ka jinglah ban plie paidbah noh ia kitei ki building, u Bah Sosthenes Sohtun, u la ai jingiaroh ia ka sorkar jylla bad khamtam eh ia ka tnat pule puthi, namar lyngba ka jingkyrpad jong u kum u nongmihkhmat, ban pynioh ia ki building ba kyrpang ha kitei ki shnong, kumta hi ka sorkar ruh ka la sngap bad kaba la long shisha ka jingmyntoi ia ki paidbah hapoh katei ka thain, kaba dei ruh ka thain kaba iajan eh bad ka Assam.
Na ka liang u MLA, u la kyntu ia ki nongpeit nongkhmieh ia kitei ki skul, ba ki dei ban sumar bha, khnang ba kitei ki building kaba la plie paidbah mynta ka sngi, ba kin neh slem bad ba kin ai jingmyntoi shisha ia ki paidbah bad khamtam eh ia ki khynnah kiba pule ha kitei ki skul.
