Shillong, Nohprah 09: Ka sorkar Meghalaya lyngba ka Anti-Narcotic Task Force mynta ka sngi ki la pynlong ia ka jingialang kaba kyrpang, ha kaba la pyniaid da u Myntri rangbah ka jylla u Conrad K. Sangma na ka bynta ban ia tai ne ia thir sani halor ka thong ka sorkar ban pynduhjaid ia ka jingshalan tuh ia u Drok ba la tip kum ka Road Map For Drug Eradication hapoh ka jylla.
Ha kane ka jingialang la ia don ryngkat ruh u Symbut Myntri ka sorkar u Bah Prestone Tynsong, ka Myntri ba dei peit ia ka tnad jong ka koit ka khiah ka Dr. Ampareen Lyngdoh, u Myntri ka tnad Pule Puthi u Rakkam Sangma, u Myntri ka tnad Social Welfare u Bah Paul Lyngdoh, ka DGP ka Meghalaya ka Kong Idashisha Nongran bad kiwei kiwei ki heh ophisar ka sorkar jylla.
Ha kane ka jingiakynduh ba kyrpang, ki la iatai sani halor ki lad ki lynti ban ia khun pyrshah ia ka jingkynrei u drok ba dei ban iakhun pyrshah da ki bor ba dei peit ka sorkar, ka tnad pulit ka jylla, ka tnad Social Welfare bad kiwei kiwei. La iatai sani ruh ruh ha kane ka jingialang halor ka jingtreikam ka ANTF bad ki buit treikam ban ia khun pyrshah ia u drok ba la donkam ba don bynta lang naduh ka tnad ba dei peit ia ka ain (law), ka tnad ka koit ka khiah, ka tnad Pule Puthi bad ka tnad Social Welfare.
Haba pynpaw halor kane ka phang, u Myntri rangbah ka jylla u Conrad K. Sangma u la ong ba ngi donkam ban don ia kata ka jingtreikam kaba khuid ban ia khun pyrshah ia u drok bad ka kynhun ANTF ka donkam ruh ban leit wad bniah na ki tnad treikam sorkar bapher bapher bad ruh ban don kata ka buit treikam na ka bynta ban ia khun pyrshah ia ka jingkynrei jong u drok.
U la ong ruh ba ka ATNF ka dei ban treikam hok ia ka kam khlem da don jingnoh shiliang bad dei ban leh katkum ki kyndon jong ka ain ha kaba ia khun pyrshah ia ka jingshalan ia u drok bad ka jingdih beain ia u drok ba la donkam ban leh sani bad ban don ka jingiatrei lang ruh naduh ka tnad ka koit ka khiah, ka tnad pule puthi, ka tnad social welfare ban pynsngewthuh paidbah halro ka jingma jong u drok sha ki samla.
Shuh shuh la ia tai ruh halor ka bynta kaba ia dei bad ka jingpynthikna ia u drok (testing) ka jingdonkam ia ka jaka ai jingsumar (Rehabilitation Centre) bad kumjuh ruh ki buit treikam ha kaba khanglad na ka jingshalan tuh ia u drok sha ka jylla.
