Nongpoh, Nohprah 09: Kum shibynta ban nang ïai leh pyrshah ïaka jingpang TB bad ban saphriang ïaka khubor sha ki shnong ki thaw halor ki dak ki shin bad ki lad jingiada ïa kane ka jingpang, Ka Ophis Jong Ka District Tuberculosis Ophisar Ribhoi District, hynne ka sngi ka la ïoh ban pynlait paidbah ïaka Program ban saphriang ïaka khubor sha ki paidbah halor ka jingpang TB ïakaba la tip ka “100 days TB Awareness Campaign”.
Ïa katei ka program kaba la pynlong ha Science Hall, Nongpoh la wan ban pynlait paidbah da u Bah Mayralborn Syiem MLA ka nongpoh kum u kongsan haka jingïadon lang ka kong B. Rani ADC Ribhoi symbud kongsan bad la ïawan ban ïa donlang ka Dr. E Kalwing District tuberculosis Ophisar, Ribhoi, Dr. D Blah Medical Superintendent Civil Hospital, Nongpoh, Dr. B Laitphlang District MCH, Dr. Angel J U Kharduid District Medical & Health Ophisar lem bad kiwei kiwei.
Ha kane ka sngi naka liang ka Ophis District tuberculosis Ophisar Ribhoi District ki la pynlait paidbah ïa artylli ki ambulance ki ban sa leit ban rung sha ki shnong bapher bapher jong ka dong bad ka thaiñ Ribhoi naka bynta ban pynsaphriang ïaka khubor halor ka jingpang TB da ka jingthmu ban rat diengkhong ïa kane ka jingpang.
Naka liang ka Ophis District tuberculosis Ophisar ka la sam ruh ïaki khusnam sha ki company bad ki riew shimet kiba la don bynta ha ka ban tiengkhun ïaki nongpang TB dakaba pynbiang iaki marbam haka por ba ki dang dih dawai.
Kitei ki nong tyngkhun ïaki Nongpang TB lane ki NIKSHAY MITRA ki kynthup ïa u vah Sosthenes Sohtun uba dei ruh u MLA ka Jirang, Mathan Alloy Limited, Shyam Ferous Century Limited, Pioneer Carbide Limited, Nezone Pipes & NTC Structure bad ka Umroi Madan VHC.
