SHILLONG, Jymmang 23: Ka Jaintia Students Union (JSU) ha ka sngi Thohdieng jong ka taiew ka la kynduh syndon ia u Myntri ka tnad PHE, u Marcuise N. Marang bad kyrpad ba un tuklar mardor ban maramot noh ia ka surok ba la sniew na Khimusniang ba pyniasoh sha ka PHE water treatment plant kaba don ha Jowai, West Jaintia Hills district.
Ha ka dorkhas ba la aiti sha u Myntri ka tnad PHE, ka Seng JSU ka la pynpaw ba kane ka surok ka dei kaba la shah iehnoh bein khlem maramot la bun snem bad kaba ktah ruh ia ki nongshong shnong ha katei ka thain.
La iathuh ruh ba u Executive Engineer ka tnad PHE ki la dep phah ia ka mang tyngka ban maramot ia kane ka surok, hynrei kumba long haduh kine ki sngi kane ka kam kam pat urlong satia.
Namarkata, na ka liang ka JSU ka la dawa ban tuklar lem u Myntri ka tnad PHE bad ruh ban pynsted ia ka kam khnang ban pynsuk ia ki paidbah kiba pyndonkam ia katei ka surok.
