Nongpoh, Jymmang 23: Haba leit jurip hynnin ka sngi ia ka Shnong Pahamjula kaba la shong dum khlem bording mynta la 18 snem naduh u snem 2007, u Myntri Rangbah ka jylla u Conrad K. Sangma u la iaroh ia ka jingpynkhreh bam kaba u la muja bha ban bam ha ka sla kait bad lada ioh kum kane ka bam ngan phah shet beit man ka sngi, u la pynpaw.
Ha kane ka jingleit jurip ia katei ka shnong, ba la lap ka jingthngan, u Mynti rangbah ka jylla u Conrad K. Sangma, u MLA u Bah Sosthenes Sohtun lem bad u Deputy Commissioner ka Ri Bhoi, u Abhilash Baranwal ki la bam ja lang bad ki paidbah da kaba pyndonkam ia ka sla kait kum ka pliang ja kumba ju bam ha ki por hyndai hynthai sha ki Shnong Nongkyndong.
Haba kylli shaphang ka bam, da ka jingkmen u Conrad K Sangma u la iaroh iaka jingbang ka bam bad ka rukom shet hakane ka shnong bad u la ong ruh ba ka doh syiar ka long ka ba bang bha, bad lada u ioh kum kane ka bam u kwah ban bam man ka sngi hala ïing.
