Nongpoh, Rymphang 24: Hadien 8 bnai ka jingjia ba hap u rangbah na ka jingkieng ha Iewsier ha ka wah Umran ba kim shym lap shuh ia ka met hapdeng ka jingiawad paidbah bad ki bor pulit ha shi lynter katei ka wah, hynrei mynta ka sngi ki pulit ka Ri Bhoi ki la ioh jingtip ba la lap sa tang ki syieng suda ba la shakut ha jrong maw sharum jong katei ka wah.
Kane ka jinglap sa tang ki shyieng ba la suba ba ka lah ban dei ka Shyieng jong utei u rangbah ba la lap nyngkong da ki nongkhwai doh, kiba la pyntip sha kiba haing bad sha ka shnong bad mynta ka step pat ki bahaing ki la wan ban pyntip noh sha ki pulit na ka bynta ban leit tohkit ia kittei ki shyieng ba la suba ki dei ki shyieng jong utei u rangbah.
Kum ban pynkynmaw, kane ka jingjia ka la jia naduh ka 27 tarik u Naitung 2025 ha ka janmiet jong ka sngi U Blei ba u rangbah ba la tip kyrteng kum u Bah Ebi Nongshli na ka shnong Umtasor u dang shongkai bad ki paralok ha jrong jongka Jingkieng kaba don ha Iewsier, hynrei kynsan kynsan u la hap najrong ka Jingkieng ha kaba u la shah rong noh ha ka umbah ha katei ka wah Umran ha kaba mynta la kot sha ka 8 bnai ba la lap sa tang ki shyieng suda ba ki pulit ki dang pynlong ia ka jingtohkit.
Kumba la ioh lum jingtip, la ong ba kitei ki shyieng briew la lap sharum jong katei ka wah ha kaba la suba ba ki dei ki shyieng jong utei u rangbah bad wat la katta ruh kim pat lah ba pynthikna pura ha kaba kiba haïing ki la kyrpad ia ki bor pulit ban leh da ka DNA test khnang ban tip pura la kitei ki shyieng ki dei neem jong utei u rangbah.
Ki pulit ka Nongpoh ki dang hiar sha katei ka jaka ryngkat kiba haing hasem naka bynta ban tohkit bniah bad ruh ban leit tam ia kitei ki shyieng ba la sahkut ha tyngkhap maw ba la lap nyngkong da ki nongkhwai doh khnang ban leh katkum ki kyndon jong ka ain.
