Nongpoh, Rymphang 26: Tang hadien ba kawei ka durkhih ka la pur sted bha ha ki rynsan social media bad ba la mih ruh ka jingpynrem kaba jur na kiba bun ki liang pyrshah ïa uwei u nongïalam bar jylla ba la tip kyrteng kum u Sunil Deodhar uba kren pyrshah ïa ka sorkar bad ïa ki niam Khristan, kane ka jingpynrem kaba jur ka la mih ruh na Umsning lyngba ka Umsing People’s Front (UPF) ha kaba mynta ka sngi ki la leit ujor syndon da ka ejehar (Zero FIR) pyrshah ïa utei u briew halor kitei ki jingkren jong u kiba wan rah ïa ka jingïapher jaid bynriew bad ka jingïapher niam.
Kumba lah ban paw, kane ka jingkren pyrshah utei u Sunil Deodhar pyrshah ia ka sorkar bad ia ki niam khristan ba ka sorkar ka leh shiliang ia ki niam Khasi ne niam tynrai, ka dei kaba u la kren paidbah ha ka shnong Tymper ba hap ha ka thain Pynursla ha East Khasi Hills, Meghalaya.
Ban pyrshah jur ïa utei u bar jylla uba la pyrshang ban wan rah ïa ka jingïapher niam, ka UPF ha ka jingïalam u Chairman u Bah David Lyngdoh lem bad ki dkhot mynta ka sngi ki la leit ban aiti ïa ka ejehar kaba ki la ujor ha ki pulit ka Umsning Police Station ban leh katkum ki kyndon jong ka ain.
Haba kren sha ki lad pathai khubor, u Bah David Lyngdoh kum u Chairman ka UPF, u la ong ba ka jingkren paidbah utei u bar jylla kumba la paw ha ki durkhih ne ha ki rynsan social media ka la ktah shisha ïa ka jingsngew jong ki paidbah hapoh ka jylla, namar ha ka jylla Meghalaya ka sorkar kam ju leh shiliang ha ki niam bad ha ka jylla Meghalaya kam ju don kata ka jingteh jingkhum ha ka liang ka jingngeit bad kino kino ki don ïa ka hok ba laitluit ban jied ïa ka jingngeit jongki.
U la ong ruh kum ki paidbah kim dei ban sngap ïa kitei ki jingkren utei u bar jylla uba la shu kren tang ban ioh ban kren khlem da tip ïa ka jinglong jingman hapoh ka jylla Meghalaya bad u la ong ruh ba kane ka jingkren jong u ka lah ruh ban long tang ba un pynrung ïa ka jingngeit Hindu ba ïa lade u dei u nongïalam ba hakhmat ka seng BJP.
Shuh shuh, u la ong ruh kane ka jingujor ejehar pyrshah ïa utei u Sunil Deodhar kam dei satia tang ban shu pyndep rukom, hynrei lada donkam ban ïaid kham shalor ruh ka UPF ka kloi ban leh ïa kata, namar ka jingkren utei u bar jylla ka la ktah shisha ïa ka jylla bad u la kyntu ruh ïa ki MLA ba ki dei ban kren ïa kane ka phang ha dorbar mang tyngka, namar kane ka la ktah shisha ïa ka jingsngew jong u paidbah ka jylla khamtam kito kiba don ha ka jingngeit Khristan.
