Da ka jingsarong ka 61 Meghalaya Girls Battalioin NCC mynta ka sngi ki la leit ban pdiang burom ïa ka samla Rifiness Warjri hadien ba ka la wan phai sha ka jylla na ka jingleit kiew ïa u lum Mount Everest kaba la long ha ka 18 tarik u Jymmang 2025 ha ka jingleit shim bynta ha ka NCC Mount Everest Expedition 2025.
Ka jingsarong ïa ka jylla Meghalaya, ka dei ruh ba ka Rifiness Warjri, ka dei tang maka na ka jylla shatei lam mihngi ka ri India kaba la shah jied ban shim byna ha katei ka NCC Mount Everest Expedition 2025 bad ka dei ruh ka sien kaba saw kum ka samla na ka jylla kaba la lah ban kiew ïa u lum Mount Everest, kata hadien Gary Jarman Lamare ha u snem 2012, ka Wansuk Myrthong ha u snem 2013 bad ka Dolyne Kharbhih ha u snem 2016.
Kum ban pyntip paidbah, ka Samla Rifiness Warjri, ka la don 20 snem ka rta bad ka dei ruh ka samla pule ka St. Anthony’s College bad kum ka NCC ha ka 61 Meghalaya Girls Battalion NCC ka jylla Meghalaya.
Ka samla Rifiness Wajri ka la lah ban kiew shaduh kliar u lum Mount Everest ha ka 18 tarik u Jymmang 2025 ha ka jingjngai kaba 8848 m na sla duriaw.
Kum ka jingsarong ïa ka samla Rifiness Warjri ka la wan nam wan rah burom ïa ka jylla, ka 61 Meghalaya Girls Battalion NCC ha ka jingïalam ka Major A.G Warjri ryngkat ki NCC, ki kmie ki kpa bad ki ba haïing hasem mynta ka sngi ki la leit ban pdiang burom ïa na Umroi Airport hadien ba ka la wan phai na katei ka jingïakop kiew lum sha la ing la sem ha la ka jylla.
Haba kren ruh sha ki lad pathai khubor halor kane ka jingjop kaba la long ka burom ïa ka jylla bad ka ri, ka Samla Rifiness Warjri, ka la ong ba kane ka jingjop jongka ban lah ban kiew ïa u lum Mount Everest ka dei hi ka jingïalam lynti jong u Blei bad baroh kito kiba la kyrshan bad ai mynsiem ïa ka.
Ka la ong ruh kam lah khlem da ai khublei ïa ki kmie ki kpa, ka ïing ka sem bad ruh ïa ka 61 Meghalaya Girls Battalion NCC, namar ka jingpoi jongka sha katei ka thong jong ka jingjop, ka dei ka jingai mynsiem bad ka jingpynslur jongki, ba ka la ioh mynsiem ban pyndep haduh ban da poi ha kliar u lum Mount Everest.
“Ka jingkiew ïa u lum Mount Everest kam dei ka kam kaba suk bad ka long shisha kaba eh bad ngi hap ban ïaleh shibun ki jingeh, hynrei namar ba ka don ïa ka thong ban jop da ka jingshlur ka la kiew haduh ban da poi ha kliar u lum Mount Everest kaba long shisha ka jingkmen ïa ka ba ka la lah ban jop ïa ka thong” ong ka Samla Rifiness Warjri.
Kum ka samla kaba la jop ban kiew ïa u lum Mount Everest, ka la phah ruh ka khubor ban ai mynsiem ruh ïa kiwei ki khun samla, da kaba ka la kyntu ba ym don kano kano kaba ngim nym lah ban jop, hyrnei lada ngi don shisha ka mynsiem bad ka jinglen lade ryngkat ka jingkyrshan na ing na sem ngin poi beit sha ka thong kaba ngi angnud ha ka jingim, ka la bynrap.
