Nongpoh, Jylliew 21: Na bynta ban tehlakam ïa ki jingjia aksiden kiba ju jia khah khah ha surokbah NH-6 ha Ri Bhoi Distsrict bad ba bun na kitei ki jingjia aksiden, ka dei ba ki kali rit ki leit ban tynrah nadien ki trok kiba ju ieng ha surokbah NH-6, hynnin ka miet ki Pulit Ri Bhoi, ki la khynra bad dain kuna naphang ïa baroh ki trok bad kiba ju ieng khlemakor ha surokbah NH-6 ha Ri Bhoi.
Lah ruh ban kdew hangne, ba ki la don shibun ki jingjia aksiden ha surokbah NH-6 ha Ri Bhoi bad kata ka long ba ki leit ban tynrah nadien ki trok kiba ju ieng ha surokbah, ha kaba ka la wanrah ruh ïa shibun ki jingjia ba sngewsih bad duh noh ïa shibun ki mynsiem ba kordor.
Kumta na bynta ban tehlakam ïa kiba kum kitei ki jingjia aksiden bad ki jingjia ba sngewsih, ki Pulit Ri Bhoi, ki la pynlong ïa ka jingleit ban peit pyrman ha shilynter ka surokbah NH-6, ha kaba ki la lap ïa shibun ki trok kiba ieng khlemakor, ïa kaba la pynlong ïa ki Pulit ba kin dain kuna bad la pynngat ruh ïa ki katkum ki kyndon ain jong ka Motor Vehicle Act.
Kumba la ai jingtip, tang hynnin ka miet ba ki la tehlakam ïa ki trok ba ieng khlem akor ha ka surokbah, ki Pulit ka Ri Bhoi ki la ioh ban dain kuna bun ki Trok ba la kot sha ka T.67000 kum ka kuna halor ka jingpynieng klem akor ïa ki Trok ha ka surokbah.
Dain Kuna Naphang Ki Pulit Ri Bhoi Ïa Ki Trok Ba Pynieng Klumar Ha Surokbah NH-6
