Nongpoh, Lber 01: Ka Ri-Bhoi Youth Federation haka sngi Saitjaiñ 28 tarik u Rymphang kala mih shakhmat ban maramot ïa ka surok bala jot rathai naka shnong Umling ban leit sha ka skul St. Francis D’Assisi Secondary School, namar ka jingkynduh mawsiang jong ki khynnah skul, ki kmie ki kpa kiba ju leit buh skul ïala ki jong ki khun.
Ha katei ka jinghiar jong ki dkhot ka RBYF na Nongpoh Circle, Byrnihat Circle, 20 mer Circle bad kumjuh ruh ka Umling Unit kila theh da ki maw ban pyndap ïa katei ka surok kaba donkam ba ki paidbah ki hap ban leit ban wan khamtam ki khynnah skul kiba ju leit skul man ka sngi.
Haba kren sha ki lad pathai khubor naka liang u Samla Rocklin Marbaniang President ka Umling Unit u la ong ba kum ka seng ka dap da ka jingsngewkhia kaba jur halor ka jinglong jingman katei ka surok bala buh jingeh shisha khamtam ïaki khynnah skul kumba dang ha kine ki khyndiat sngi kala don ruh ka jingmynsaw jong ki khynnah skul kiba leit sha katei ka skul daka scooty namar ka jingsniew palat ka surok.
Dei halor katei ka nongrim ba kum ka seng kala shim ïaka sienjam katba lah ka bor ban maramot ïa katei ka surok naka bynta ka jingsuk jong ki paidbah bad ki khynnah skul bad haka juh ka por kala kyntu ruh ïa u nongmihkhmat bad kumjuh ruh ka sorkar ban phai khmat lem ban pynioh skhim ïa katei ka surok naka bynta ka jingbit jingbiang jong ki paidbah.
