Shillong, Lber 02: Ha ka jingiakhun ba nyngkong ka Shillong Lajong Football Club ha ka National Football League 2026, kaba la long hynnin ka janmiet ha Madan SSA Stadium, Nongbah Shillong bad kaba la iakhun pyrshah ia ka Rajasthan Football Club, ka jingiakhun ka la kut noh ha ka jingiakhaid kaba 1-1.
Kum ban shu kdew hangne, ba ha ka jingiakhun kaba hynnin ka janmiet, ka Shillong Lajong, ka la dei tang da ki rangialehkai na ka jylla Meghalaya bad kiba kham bun dei ki rangialehkai kiba dei ki Khasi.
Ka jingiakhun kaba hynnin ka janmiet, ka dei ka jingiakhun kaba itynnad bad kaba la pynhun ia kiba bun ki briew kiba la leit ban sakhi ia katei ka jingiakhun, kam pher watla ka Shillong Lajong, kam shym la lah ban khur ia ka 3 poin.
Ha katei ka jingiakhun, ka Shillong Lajong, ka la ioh ban lamkhmat ia ka jingiakhun, kata lyngba ka shikol kaba la thep da u Everbrightson Mylliempdah, uba la ioh thep kol ha ka dur jong ka Penalty bad uba la thep ha ka minit ba 15 jong ka kylla step.
Haba bteng ka kylla miet jong ka jingiakhun, ki Rangialehkai ka Rajasthan United, ki la iakhun tyngeh na bynta ban pynphai ia katei ka shikol ba ki la shah thep ha ka Shillong Lajong, kumta ha kaba kum katei ka jingiakhun, ka Rajasthan United, ka la ioh ban pynphai ha ka minit ba 54 ia kaba la thep da u Abhishek Ambekar.
Haduh ba kut ki ki 90 minit, ka jingiakhun ka la kut noh ha ka jingiakhaid kaba 1-1 bad kaba la pynlong ia kitei ki ar kynhun, ba kin hun ban iasam noh mar shi poin.
Ka jingiakhun kaba bud ia ka Shillong Lajong kan long pyrshah ia ka Real Kashmir, ka ban sa long ha Nongbah Shillong.
