Nongpoh, Lber 02: Ki paidbah ka shnong Chihbra, kaba dei kawei na ki shnong khappud hapdeng ka Meghalaya bad Assam, kaba don ha ki thain Umtyrnga ha Ri Bhoi, ki la kmen eh bad kata ka dei ba mynta ka sngi, u Bah Sosthenes Sohtun, MLA Jirang bad uba dei ruh u Myntri ha ka sorkar jylla, u la leit ban plie paidbah ia ka Iing Dorbar kaba u la pynioh hapoh katei ka shnong.
Ka nongrim kaba la pynkmen eh ia ki nongialam shnong bad ia ki paidbah hapoh katei ka shnong, hadien ba ki la ioh ia katei ka Iing Dorbar thymmai, ka dei namar ba ha kine ki snem kiba la leit noh baroh, ba kim don ia ka Iing Dorbar kaba paka, na bynta ban iakren halor ki kam shnong kam thaw.
Ia katei ka Iing Dorbar, la shna ha ka jinglut kaba la poi sha ka T. 5 Lak, ha kaba la shna lyngba ka skim SRWP jong u snem 23 -24.
Lyngba katei ka sngi, ba la plie paidbah ia katei ka Iing Dorbar, ki nongai jingkren kiba dei ki nongialam ka shnong Chicbra, ki la ai ka jingiaroh kaba khraw eh ia u Bah Sosthenes Sohtun, namar ka jingshimkhia ka jong u ban pynioh Iing Dorbar hapoh katei ka shnong.
