Shillong, Lber 20: U Symbut Myntri Rangbah ka Jylla ba khmih iaka tnat District Council Affairs (DCA) u Bah Prestone Tynsong hynne ka sngi ula pyntip ba Dorbar kypang jong ka Garo Hills Autonomous District Council (GHADC) kan long haka 23 tarik bad 24 tarik Lber 2026.
Haba pyntip ïa kane u Bah Prestone Tynsong u la ïathuh ba u Lat ka Jylla ula dep ban pynmih iaka jingpynbna (Notification) haba iadei bad ka Dorbar kyrpang jong ka GHADC.
U Bah Prestone u la ïathuh baka mat jong ka Dorbar kyrpang jong ka GHADC kadei ban ïakren halor ka jingdonkam ban pynkylla (Amend) iaka AD Rules bad ban mynjur iaka Vote on Account jong ka mang tyngka.
Haba kylli, u Symbut Myntri Rangbah u la ong “Ngam lah ban ong eiei halor ka jingdonkam ka Dorbar kypang namar ka AD Rules kam kdew tang iaka 128 hynrei hapoh ka AD Rules ruh ki don ka kyndon 8, 7 bad 6.
Ïa kane u Symbut Myntri Rangbah u la jubab haba iaka jingkylli, hato kan don ne em ka jingïakren halor ka jingdawa ban nym shah iaki bym dei riewlum ban shim bynta haka ilekshon GHADC.
“Balei ka Sorkar kan tuklar iaka bor jong ki District Council. Ki District Council ki don iaka bor thaw ain (Legislative Power) balei ka Sorkar kan batai iaki District Council ban iasyllok bad u A,B,C ne D. Ka dei ka kamram jong ki, ka shong haka bor jong ki namar iaka Dorbar kyrpang la buh ban pynlong ar sngi kata haka 23 tarik bad 24 tarik Lber 2026” la ong u Bah Prestone.
“Namar kata ngim dei ban shu pynkut kyrkieh, kumba nga la ong ngin ap shwa iaka jingpynkylla (Amendment), namar ngi hap burom iaka rai jong ka iingdorbar thawain ka GHADC” u la bynrap.
