Nongpoh Jylliew 23: Haba leit shim bynta ha ka jingrakhe ka jingiaid lynti kaba 60 snem ka SOS Children’s Village, Shillong kaba don ha Umiam, Ri Bhoi District mynta ka sngi, u MLA ka Umroi Constituency u Bah Damanbait Lamare u la pynpaw ia ka jingsngewmyllung ka mynsiem ban iohi ia kiba bun ki khunswet kiba la ri la sumar ha katei ka jaka ri khunswet ba ki don hapeng ka koit ka khiah bad ka kmen ka sngewbha.
U la pynpaw ruh ba dei lyngba ka jingdon kum kine ki jaka ri khunswet, ki khunswet ki ioh ia kata ka jingsumar sukher kaba bit babiang naduh ka bam ka dih, ka riam ka beit, ka koit ka khiah, ka pule ka puthi bad baroh ki jingdonkam jong ka jingim, ha kaba wat lada kim don ki kmie ki kpa ne kiba haïing hasem bad ki don pat ha pdeng ka jingkmen ka jingsngewbha ba ki ioh ia kata ka jingsumar kaba paka.
Ka SOS Children’s Village, Shillong mynta ka sngi ka la ia snoh kti lang ha ka ri hi baroh kawei ban rakhe ia katei ka jingiaid lynti kaba 60 snem ka SOS Children’s village ha ka ri bad ka pyrthei hi baroh kawei. Kum ban pynkynmaw, ka SOS Children’s village, Shillong la seng ia ka ha u snem 1999, ka jingthmu ka long hi kumjuh ban ri ban sumar ia ki khunswet kiba ym don kmie don kpa bad kiba shah iehnoh bein ha ka imlang ka sahlang.
La rakhe ruh ia kane ka SOS Day man la u snem ha ka 23 tarik u Jyllliew ban kynmmaw burom ia ka sngi kha u Dr. Hermann Gmeiner, uba dei u nongseng ia kane ka SOS Childrens’ village, kaba dei ka jaka kaba ai jingim ban sumar sukher ia ki khunswet.
Ka thong ba hakhmat kane ka jaka ri khunswet lane ka SOS Children’s Village ha Shillong, ka dei ruh ka thong ban ai ia ka longïing longsem ia ki khynnah kiba la duh ia la ki kmie ki kpa bad kiba shah iehnoh beiñ ha ka imlang ka sahlang. Ha kane ka sngi la sam ruh ia ki khusnam sha kito ki khynnah khunswet kiba la pas bha ha ki examination.
Rakhe Ka SOS Umiam Ïaka SOS Day, Lung Mynsiem U MLA Ban Iohi Ïaki Khunswet
