Kawei ka longkmie na ka shnong Sohlait Thymmai, Ri Bhoi District, mynta ka sngi ka la pynpaw pyrthei ia kawei ka kam thok kam shukor, kaba lehse kadei ruh kawei na ki kam bamsap kaba shyrkhei ha kaba iadei bad ka jingsam ia ki tyndong lyer shet jongshet kiba ju tip ruh kum kita ki cylinder gas ha ka thain Nongpoh.
Ia kane ka kam shukor, la lap da ka Kong Marian Syngkli kaba la iathuh ba manla ka por ka tyndong shet jingshet, ka ju neh kumba shi bnai eiei, hynrei ha kane ka kynti, katei ka tyndong kaba ka la ioh ha ka 11 tarik jong u bnai jylliew ka la lut noh tang hapoh ar taiew, kata ha ka 24 tarik jong utei u juh hi u bnai. Ia kine ki tyndong la sam sha ki paidbah da ka Ri Bhoi Gas Agency.
Katei ka jinglut kloi jong katei ka tyndong lyer, ka la pynlong ia katei ka Kong Marian Syngkli ban suba sniew bad haba la pyrshang ban khmih bniah la shem ba ka don ka jingsawa jong ka um kaba bun shapoh katei ka tyndong. Katei ka tyndong kadei ban khia tang 15.2 kilo ryngkat bad ka lyer (gas), hynrei haba pyrshang iaka wat hadien ba ka lah dep ban lut ruh, ka dang khia haduh 19.80 kilo.
Halor kane ka jingshah thok shah shukor, ka Kong Marian Syngkli, ka la leit ban ujor syndon da ka ejahar ha Nongpoh Police Station na ka bynta ba kin shimkhia ban pynlong ia ka jingtohkit bad ban pynshitom halor kitei ki kam thok kam shukor katkum ki kyndon jong ka ain.
