Ahmedabad, Naitung 12: Katba ka jingtohkit ïaka jinghap jong kawei ka liengsuiñ Air India dang shen ha Ahmedabad ka dang ïaid kaba la wanrah ruh ka jingïap briew kumba 260 ngut nalor kiba shong ha katei ka liengsuiñ, ka tnad tohkit ïaki jingjia aksiden liengsuiñ jong ka India ka Aircraft Accident Investigation Bureau (AAIB) kala pynmih ïaka kaiphod ba nyngkong ba dei ka jingpynlip noh ïa ka umphñiang ban ïaid sha ka engine tang hadien khyndiat por ba kala her sha suiñ.
Haka jingïakren jong ki pilot la lap ruh ïa ka sur bad lah ban ïohsngew ïa uwei na ki nongniah liengsuiñ ba u kylli “balei phi pynlip noh?” ha kaba uwei pat u pilot u la jubab ba u “um shym la leh kumta”.
Ka liengsuiñ Boeing 787-8 Dreamliner, kaba leit sha London, ka la hap tang khyndiat minit hadien ba ka la kiew ha ka 12 tarik Jylliew, na kad liengsuiñ ha Ahmedabad, ha ka thaiñ sepngi jong ka India, ha kaba 260ngut ki briew ki la ïap, bad tang uwei u ba shong ha katei ka liengsuiñ u la lait im na katei ka jingjia ba shyrkhei.
Ka jingtohkit ba la ïalam da ka Aircraft Accident Investigation Bureau (AAIB) ka dang ïaid shakhmat, ha kaba la khmih lynti ba kin lap shuh shuh ïaki daw tynrai jong katei ka jingjia.
