Delhi, Naitung 12: Ar ngut ki briew ki la iap bad bun ngut kila mynsaw bad la ioh ban pyllait im hadien ba kawei ka iing kaba saw mala ka la twa kynsan ha ka por kumba 7:00 baje mynta ka step sngi saitjaiñ ha Janata Mazdoor Colony jong ka Seelampur, kaba don ha ka thain shatei lam mihngi jong ka Delhi’s Welcome area. Ka jingtei ka la twa kynsan katei ka building, kala pynlong ruh ïaki bun ngut ki briew ban sahkut shapoh.
Naka liang ki pulit kila her mar mar sha katei ka jaka bad ioh ruh ban pynlait im katto katne ngut ki briew bad rah sha jaka sumar. La iathuh ba ki don kumba 12 ngut ki briew kiba ju sah ha katei ka iing, kynthup ia lai ngut ki khynnah bad lai ngut ki kynthei.
Naka liang ka kynhun National Disaster Response Force ha ryngkat ki pulit pynlip ding bad kiwei kiwei ki tnad ki don ha katei ka jaka, ban ioh sei bad pynlait im ïaki briew ba sahkut shapoh bad haduh mynta ym pat lah ban tip ïa ka daw kaba thikna jong katei ka jingtwa.
