Munich, Jylliew 15:
Ka lympung ialehkai European Cup, 2024 kaba la pynlong ha ka nongbah Munich jong ka ri Germany, ka la sdang lyngba ka jingialehkai jong ki kynhun ha ka Group A ha ka sngi Thohdieng, ha kaba ka Germany kum ka ri kaba pdiang ban pynlong ia kane ka lympung ialehkai phutbol kaba heh duh ha ka dewbah Europe, ka la lah ban khyrwit jem ia ka Scotland da kaba thep haduh 5 kol la 1 kol.
Ia ka kol ba nyngkong jong ka Germany la ioh ban thep da u Florian Wirtz ha ka minit kaba 10, pynbud sa ka kol na u Jamal Musiala ha ka minit kaba 19 bad ka kol penalty kaba la shut da u Kai Havertz ha ka minit kaba 45+1, ka la pynlong ia ka ri Germany ban tam lypa da 3 kol la 0 ha ka kylla step jong ka jingiakhun.
Ka jingioh shut penalty jong u Kai Havertz kadei hadien ba u nongapbol ba shadien (defender) jong ka ri Scotland, u Ryan Porteous u la kum leit kynjat ia u rang ialehkai ba ap pdeng (midfielder) ka ri Germany, u Ilkay Gundogan hapoh jong u lain ka synduk penalty lane kata ka penalty box, kat haduh ba u referee lyngba ka jingkhmih bniah lyngba ki jingringdur jong u Video Assistant Referee (VAR), u la ai syndon da ka red card ia utei u rangialehkai ka ri Scotland.
Ha ka kylla miet jong ka jingialehkai pat, ka ri Germany kala ioh biang ban thep sa ar tylli kol lyngba u Niclas Fullkrug ha ka minit kaba 68 bad u Emre Can ha ka minit kaba 90+3, katba na ka liang jong ka ri Scotland ka lah ban pynphai kylla tang 1 kol, ia kaba la ioh ban thep da u Antonio Rudiger ha ka minit kaba 87 jong ka kylla miet.
Kum ban shu kdew hangne, ka European Cup 2024 kaba la pynlong ha ka ri Germany, la wan ban iashim bynta da 24 tylli ki ri jong ka dewbah Europe kiba la shah phiah ha ki 6 tylli ki kynhun ba kynthup ia ka Group A- Germany, Scotland, Hungary bad Switzerland. Group B- Spain, Croatia, Italy bad Albania. Group C- Slovenia, Denmark, Serbia bad England. Group D- Poland, Netherlands, Austria bad France. Group E- Romania, Ukraine, Belgium bad Slovakia. Group F- Turkey, Georgia, Portugal bad ka ri Czech Republic.
