Nongpoh, Lber 28: Ka Raid Nongpoh ba hap ha ka Elaka Nongpoh Sirdarship mynta ka sngi ka la pyndep ia ka shad Sajer, kaba dei kawei naka jingshad tynrai kaba ki ju pynlong man la u snem kumba la ialam da ki Longshuwa ki manshuwa ha kawei na ka jaka kyntang ba la tip kum u Lum Wyrtoh ha Nongpoh Ri Bhoi Distrct.

Kane ka Shad Sajer ka dei kawei na ka jingshad tynrai ka Raid Nongpoh ba kum ka Raid ka la sdang ban pynim biang ha kine ki sngi, ha kaba ka thong ka long ban pynneh pynsah ia ki riti ki dustur bad ki shad tynrai bapher bapher kiba don la ki jong ki jong ki jingkit jingmut.

Ia kane ka Shad Sajer ka Raid Nongpoh la wan ban shim bynta da u Bah Mayral Born Syiem MLA ka Nongpoh kum u kongsan bad la sakhi lang ruh da ka jingdon lang u Acting Sirdar ka Elaka Nongpoh Sirdarship u Bah Luistar Lyngdoh, u Lyngdoh ka Raid Nongpoh u Bah Linus Lyngdoh, Ki Lyngdoh Raid bad ki Longsan ki Masan, ki nongialam ka seng RBYF, HNYF bad kiwei kiwei ki riew rangbah ka thain Nongpoh.

Ka jingshim bynta ki samla na ki kynhun bapher bapher ka Riad ha ka riam tynrai bad ryngkat ki jingrwai bad ki jingshad tynrai ka la pynphuh pynphieng bha ha kane ka sngi ba la pynlong ia kane ka Shad Sajer. Ka kynhun ki samla ki la pyni ia ki jingshad tynrai kum ka shad Mastih, ka shad rah kynthei, ka shad shutwait bad kiwei kiwei.

Haba ai jingkren ha kane ka sngi u Bah Mayral Born Syiem u la pynpaw ia ka mynsiem jong ka jingkmen ban ia sakhi ia kane ka Shad Sajer ka Raid Nongpoh, da kaba bynrap ruh ba kane ka Shad Sajer ka dei kawei na jingshad ka pyni sha ka pyrthei ba ka Raid Nongpoh ka don ia la ka jong ka riti ka dustur bad jinglong tynrai hapoh ka Raid.

U la kyntu kyrpang ruh naduh ki nongialam Raid bad ki khun ki hajar hapoh ka Raid ba ki dei ban ban klet ia la ka tynrai bad hap ruh ban sngewthuh la kiba dang bat ia ka niam tynrai ne kiba la long ki Khristan bad ka thong jong kane ka shad Sajer ka long ban tip ia la ka jong ka tynrai.

Shuh shuh, u la bynrap ruh da kaba ong ba hakane ka juk stad ka juk saian bad ka juk jong ka jingwan ka jingnang jingstad ngi hap ban bud ia ki katkum ka jingiaid ka por, hynrei tang kawei pat kaba donkam eh ka long ba ngim dei pat ban klet ia ka tynrai.

Kiwei kiwei kiba la ai jingkren ha kane ka sngi naduh u Bah Luistar Lyngdoh bad kiwei ki  nongialam ki la pynmih ia kajuh ka sur ba kum ki khun ki hajar ki hap ban tip ia la ka tynrai bad kane ka Shad Sajer ka dei kawei naka jingshad tynrai kaba ngi pynneh pynsah ia ka riti ka dustur hapoh ka Raid.