Hiar u Bah VGK Kynta sha Ri Bhoi ban pynithuh kum u kyrtong UDP, pan jingkyrshan ruh na ki paidah ka Ri Bhoi

Nongpoh, Naitung 14: Ka United Democratic Party UDP Ribhoi mynta ka sngi ka la pynlong ïaka jingïalang paidbah ha Nongpoh naka bynta ban pynithuh sha ki Nongkyrshan jong ka party ia u Bah VGK Kynta ïa kaba ka Party ka la ibit ban jied ia u kum u Kyrtong MP ka Party u ban ia khun haka Election Shiteng Samoi na Shillong Parliamentary Seat.

Ha kane ka jingialang paidbah la wan ban pynshit pynshngain lang da u Bah Metbah Lyngdoh President Rangbah jong ka Party, U Bah Titos Chyne Secretary UDP, u Bah Mayralborn Syiem u MLA ka Nongpoh, Bah Alantry Dkhar Vice President ka UDP, Bah Balajied Rani President UDP Ribhoi, Bah Michael Kharhunai Secretary UDP Ribhoi, Bah Tirot Singh Suchiang, Bah James Sylliang lem bad kiwei kiwei.

Also read:Tur ki paidbah bad ka Seng JNC bad JSU sha JHADC ba kynnoh tur jaka ban buh ia ka Mining ka Shree Cement

Ha ba kren naka liang u Kyrtong u Bah VGK Kynta u la pan ka jingkyrshan naki paidbah kiba la wan poi ha katei ka jingialang dakaba ong ba kum u Kyrtong un ieng skhem halor ka Nongrim jong ka party bad un trei shitom ba un pynurlong iaki mat jingdawa ba kum ka Jaitbynriew ka la ju dawa naduh kipor mynshwa.

Shuh shuh u la ong, Ban dawa iaka ILP kam dei eh kaba jynjar ban ioh ba bun ki Seng ki la mih shakhmat ban dawa, hynrei haduh mynta kam pat urlong,  lehse kiba dawa iaka ILP ki iaid daka lynti kaba bakla bad lehse kim don iaka jingiasngewthuh jingmut. Kumta u la kyrpad iaki paidbah ba kin ailad ia u ban long kum u MP khnang ba yn lah ban pynurlong ïa kane ka mat ILP kaba donkam eh hapoh ka jylla Meghalaya.

Haba kren pat naka liang u Bah Metbah Lyngdoh u la iathuh ba ka party kam kwah ban jied ia u Briew uba nang tang ban kren ban pynbeij Briew hynrei ka party ka jied ia u Briew uba nang trei iaka kam bad ba ka party kam phah ruh ia u MP ym tang ban shu kren hapoh Iing Dorbar hynrei u ban ia sait bad ia tai naka bynta ki mat jong ka Jaitbynriew haduh ba kin da urlong.

Also watch:

U Bah Metbah u la pynskhem ba u Bah VGK Kynta u long uta u Briew uba la ibit ban long kum u MP bad u ba lah ruh ban ia sait bad ban pynurlong iaki mat jingdawa jong ka ri bad ka Jaitbynriew.

Ha kane ka jingialang la ioh ruh iaka jingkren na U MLA ka Nongpoh u Bah Mayralborn Syiem, U Bah Tisos Chyne bad kiwei kiwei hakaba kine ki nongkren ki la Pynpaw ba u Kyrtong ka Party u long shisha uba la ih bad uba stad ban trei ia ka kam bad u long u Kyrtong uba ka ka Jaitbynriew ka lah ban shanniah.