Nongpoh, Naitung 14: Ki paidbah na ki shnong bapher bapher ha ka thain Mawrong Road, kaba hap ha Mawhati Constituency, mynta ka sngi ki la tuid sha ka shnong Mawlyngkhung, kata ka long ban leit sakhi ia ka jingialang ka NPP ka la pynlong ia ka jingialang ialap Ilekshon ka MP Shiteng Samoi na bynta u Dr. DRL Nonglait.
Ha katei ka sngi ba ka NPP, ka la pynlong ia katei ka jingialang ialap Ilekshon Shiteng Samoi na bynta u Dr. DRL Nonglait, la sakhi da ka jingdon u Ma Sniawbhalang Dhar, Symbud Myntri Rangbah, u Bah Sosthenes Sohtun, Myntri Sorkar, u Dr. Celestine Lyngdoh, MLA Umsning, u Damanbait Lamare, MLA Umroi, u Bah Charles Marngar, MLA Mawhati lem bad kiwei de ki heh nongialam ka NPP.
Lyngba katei ka jingialang, u Dr. DRL Nonglait, haba ai jingkren sha ki paidbah, u la kyrpad ia ki paidbah ha katei ka thain, ba kin ai ka jingkyrshan kaba pura bad ban pynjop ia u ha kane ka Ilekshon MP Shiteng Samoi na Shillong Parliamentary Seat.
Ha ka jingkren u Dr. DRL Nonglait, u la pynpaw ruh ia ki kyntien da kaba ong, ba ha kane ka juk kaba mynta, ngi donkam eh ia ka Politik kaba iohi jngai, na bynta ban wanrah ia ka roi ka par ha ki shnong ki thaw bad ruh ban pynjan ia ki Sor sha ki Nongkyndong, khnang ba kan pynsuk ia ki paidbah, la ka long lyngba ki Iew ki Hat, ki jaka pule puthi lem bad kiwei.
Peit ruh:
Kiwei pat ki nongai jingkren, kaba kynthup Ma Sniawbhalang Dhar, nangta u Bah Sosthenes Sohtun, u Dr. Celestine Lyngdoh, u Damanbait Lamare bad u Bah Charles Marngar, ki la kyntu ia ki paidbah kiba la poi sha katei ka jingialang lem bad ia ki paidbah ha Ri Bhoi hi baroh kawei, ba ha kane ka kynti kaba mynta, ba kin ai ka jingkyrshan ia ka NPP bad ban pynjop ia u Dr. DRL Nonglait.
