Hadien ka Northeast United Football Club, mynta sa ka Mohun Bagan Super Giant ka kynhun ialehkai na Kolkata, ka la rung sha ka Final jong ka Durand Cup 2024, ia kaba kin sa iakhun ia ka Final ha ka 31 tarik mynta u Bnai ha Salt Lake Stadium Kolkata.
Ha ka jingiakhun ka Semi-final ba nyngkong ha Shillong kaba la long hapdeng ka Northeast United FC pyrshah ia ka Shillong Lajong FC, ka Northeast United ka la pynliem noh ia ka Shillong Lajong da 3-0, kaba la pynthikna ruh ïalade ban rung sha ka Final ha katei ka lympung ialehkai kaba la rim eh ha Dewbah Asia.
Katba ha ka jingiakhun ka Semi-final ba-ar mynta ka sngi ha Kolkata, kaba la long hapdeng ka Mohun Bagan Super Giant pyrshah ia ka Bengaluru Football Club, ka Mohun Bagan ka la pynliem ia ka Bengaluru FC da 4-3 ha ka jingiakhun kaba la poi sha ka jingiashut tie breaker.
Ka jingiakhun hapdeng kitei ki kynhun ba khlaiñ hapoh ka ri, ka long ba ka Bengaluru FC ka la ïoh ban thep kol nyngkong bad kiba la pynkut ia ka kylla step da 1-0.
Haba bteng ka kylla miet, tang mar ia sdang ka jingiakhun ka Bengaluru FC ka la ïoh biang ban thep sa shu kol bad kaba la pynlong ia ka Bengaluru FC ba kan tam da 2-0 pyrshah ia ka Mohun Bagan. Hynrei katba ki minit ka jingiakhun ki dang ïai shakhmat ka Mohun Bagan ka la ïoh ban pynphai shi kol bad tang katto katne por, ka Mohun Bagan ka la ïoh biang ban thep sa shu kol bad kaba la pynlong ia ka jingiakhun ba kan iakhaid da 2-2.
Haba la kut ki ar-kylla jong ka jingiakhun, la rah noh sha ka Tie breaker bad dei ha ka jingiashut Tie breaker, kaba la pynlong ia ka Mohun Bagan ba kan pynliem ia ka Bengaluru FC da 4-3 bad ban pynthikna ruh ban rung sha ka Final jong ka Durand Cup 2024.
