Katba ka jingiap briew ka nang kiew ha ki jingiakhih kaba shyrkhei kaba la kylla long ruh kum ka thma pohiing haka ri Bangladesh, ki tyllong khubor ki ïathuh ba ki pulit jong ka ri Bangladesh kila ioh ïaka hukum ban siat naphang (shoot-at-sight) ban tem ïaka jinglong jingman bad ka jingkulmar ha katei ka ri.
Naka liang ki bor synshar jong ka ri Bangladesh kila dep pynjari ruh ïaka korphiw ha baroh kawei ka ri bad khang ruh ïaka kor Internet bad telephone.
Ia katei ka korphiw la pynjari naduh ka miet sngi thohdieng bad khmih lynti ruh ba kan neh haduh mynta ka step sngi u Blei, hynrei haduh mynta kam pat don kano kano ka jingpynbna ba yn weng noh ïaka korphiw bad baroh ki lad pathai khubor ha kylleng ka ri kim shym la lah ban pynmih khubor ei ei naduh ka 19 tarik mynta u bnai, kaba la wanrah ruh ka jingeh kaba khraw ban tip kaei kaba jia ha katei ka ri.
Shuh shuh katkum ki tyllong khubor la ioh jingtip ruh ba ïaka korphiw la weng shipor haka shiteng sngi jong ka sngi Saitjaiñ ban ailad ïaki paidbah ban plie ïaki dukan bad bthah ruh ba ki paidbah kim dei ban mih kulmar bad ki dei ban shong khop hala iing bad khang ruh ïa baroh ki jait jingïalang bad ki jingïakhih.
Haduh mynta ka sorkar Bangladesh kam pat lah ban ai jingkheiñ ïaki briew bala duh noh ïala ka jingim ha katei ka jingïakhih kaba la kylla long kum ka thma pohiing, hynrei la ioh jingtip da ki spah ngut ki mynsiem kila duh noh ïala ka jingim.
