Nongpoh, Nailur 14: Hadien ka jingpynpaw ïa ka jingsngewkhia kaba jur da ki trai trok bad nongñiah trok halor ka jingduna jong ki jaka ba biang ban pynieng ïa ki trok ha Ri-Bhoi District, ka bor district ka Ri-Bhoi mynta ka sngi ka la pynlong ïa ka jingjurip lang bad ka Meghalaya Commercial Truck Owners and Drivers Association (MCTODA), NHAI bad NHIDCL ha shi lynter jong ka National Highway-6, naduh Jorabat haduh Umdihar.
Kane ka jingjurip ka long hadien ba ka MCTODA ka la dep ban leit ai da ka jingthoh sha u Deputy Commissioner ka Ri-Bhoi, bad hadien ka jingïalang kaba la long hapdeng ka kynhun bad ki bor district ban ïakren halor ka jingeh kaba ki nongñiah trok ki ïakynduh man ka sngi.
Ka MCTODA ka la pynpaw ba ka jingbym don jong ki jaka kyrpang ban pynieng trok ka la wanrah ïa ka jingeh kaba khraw ïa ki nongñiah, khamtam namar ka jingpynjari ïa ki kyndon ban khang ïa ka jingieng trok harud National Highway na ka bynta ka jingshngaiñ jong ki paidbah.
Katkum ka Association, bun sien ki nongñiah ki hap ban bteng ïa ka jingïaid watla ki la sngewthait ne don jingpang, namar lada ki pynieng ïa ki trok ha ki jaka bym shah, ki lah ban shah daiñ kuna bad shah pynngat ha kiwei kiwei ki jingeh bad ka pynbun pynban ki jingjia aksiden. Ka kynhun ka ong ba kane ka la poi sha ka bynta kaba ym lah shuh ban shu ap ne pynslem.
Peit ruh:
Ha ka jingjurip, ki nongmihkhmat ka MCTODA ki la pyni bad tyrwa ïa bun tylli ki jaka kiba lah ban long kum ki truck lay-by, bad ki la ban jur kyrpang ïa ka jaka kaba don shakhmat ka NHAI Toll Gate ha Pahammawleiñ haba hiar sha Guwahati.
