Khliehriat, Nailur 14: Haba sdang ka Thomas Nongtdu 1st Division ka lympung ialehkai phutbol kaba la pynlong da ka East Jaintia District Sports Association (EJDSA) ha Madan Artificial ha Deinshynrum, ka kynhun ialehkai ka Khliehriat East YWSC, ka la sdang ia katei ka lympung ialehkai da ka khur namjop pyrshah ia ka Musniang Sports Club, hadien ba ka la lah ban pynliem noh da 1-0.
Ia katei ka lympung ialehkai phutbol, ka leit ban plie pyrda da ka Kong Santa Mary Shylla, MLA jong ka Sutnga-Saipung, ha ryngkat ka jingdon ka Kong Violet Lyngdoh, kaba dei ka MDC ha JHADC, u Ma James Sutnga, General Secretary ka EJHDSA, ki nongkitkam ka EJHDSA, ki riew rangbah ka thain lem bad kiwei.
Haba ai jingkren ha katei ka sngi, ka Kong Santa Mary Shylla, ka la ai jingiaroh bad sngewnguh ia ki nongkitkam ka EJHDSA, kiba la kynmaw burom bad ainam ia katei ka lympung ialehkai ia u Kpa jong ka, u Ma Thomas Nongtdu, uba dei ruh kum uwei na ki riew khraw ha East Jaintia Hills District.
Peit ruh:
Haba phai sha katei ka jingiakhun jong kitei ki ar kynhun, ka dei ka jingiakhun kaba iakhaid bad itynnad bha, namar kitei ki rangialehkai jong baroh ar kynhun, ki la iakhun dohiap ban khur namjop, hynrei ha ka jingiakhun, ka Khliehriat East YWSC, ka la lah ban pynliem noh ia ka Musniang SC da 1-0.
