Nongpoh, Nailur 17: Ka la don kawei ka jingjia hynnin ka janmiet ha ka por 6 ba eiei ha shnong 10Mer, kaba hap ha Khanapara Police Station, Ri Bhoi ha kaba uwei u nongbylla uba la tip kum u Ratul Deka, 40 snem ka rta na Morigaon, Assam, u la hap najrong ka Building kumba 20 phut eiei, ka Building barim jong ka Karkhana pynmih Yummy bad kaba dang thmu ban shna thymmai pat da kawei.
Ka jingtip kaba la iohlum, la ong ba utei u nongbylla, u la kiew shaneng jong ka Building, na bynta ban pynpra ia u bim barim ka Building ka Karkhana pynmih Yummy, hynrei katba u dang pynpra ia u bim, utei u nongbylla u la hap kynsan najrong shapoh haduh ba un da mynsaw jur.
Hadien katei ka jingjia, ki para ba iabylla ha katei ka jaka, ki la pynkit noh ia u sha ARHI Hospital, hynrei haba la poi ha jaka sumar utei u nongbylla u la khlad noh hadien katto katne por, kata namar ba u la jur eh ka jingmynsaw ha ki bynta ka khlieh.
Halor katei ka jingkhlad noh utei u nongbylla, ki Pulit ki la shimti ia ka jingtohkit bad ki la pynkit noh sha Nongpoh Civil Hospital, na bynta ban leh ia ka Post Mortem.
Haba iadei bad katei ka jingjia, ki Pulit ka Khanapara Police Station, ki la leit ban jurip ia katei ka Karkhana, na bynta ban peit bniah ia ka rukom trei bad ki tiar iada la ki pynbiang ne em ia ki nongtrei bad kiba la wad ruh ia u Kontraktor uba la wanrah ia kitei ki nongbylla ha katei ka jaka.
