SHAH KEM 3 NGUT KI SHIPAI BSF HA UMKIANG, HAP PYNLAIT BIANG KI PULIT HADIEN BA TUR KI SHIPAI SHA THANAD

Khliehriat, Jylliew 21: Hadien 3 ngut ki shipai BSF bala kynnoh thombor ïa kawei ka longiing bad kumjuh ruh ïaka khun kynthei ba dang 15 snem ka rta, ki shah kem haki pulit jong ka Umkiang Police Patrol Post kaba hap hapoh ka jingpeit jingkhmih jong ka Lumshnong Police Station, ki shipai BSF hynnin ka miet da ka kynhun kaba don kumba 35-40 ngut kila leit ban tur sha katei ka thanad ban dawa pynlait ïaki shipai ba shah kem, bad namar ka jingduna jong ki briew ki pulit ka Umkiang kim banse ban pynlait noh ïaki.
Kum ban shu kdew hangne kitei ki shipai BSF kila shah ujor da ka ejahar ha Umkiang Police Patrol post hadien ka jingkynnoh ba kila leit ban khynra jubor ïa kawei ka iing bad rah ruh da ki tiar pynmynsaw, ban kren ruh da ki ktien khlem akor bad ban ktah kti ïa kawei ka khyllung kaba dang 15 snem ka rta bad kumjuh ruh ïa u kpa bad ka kmie, kumba ki video kila saphriang ruh haki rynsan social media.
Naka liang u SP ka East Jaintia Hills u la pyntip ba ki pulit kila dep register ïaka case ha Khliehriat Women PS haki kyndon aiñ bapher bapher bad kumjuh ruh ka POCSO Act bad ka jingtohkit ka dang ïaid shakhmat.