Nongpoh, Nohprah 01: Hadien ka jingkynad kaba la mih haka shnong khappud ka Meghalaya bad Assam haka thaiñ Maikhuli naka jingleh dusmon ki briew bym lah ban ithuh na Assam kiba la leit ban tah rong bad pyndam ïaka jingthoh ha ar tylli ki maw nongrim jong ka jingpyntrei ïaka skhim MNREGA ha katei ka shnong kaba la poi ruh sha u pud ka jingumsnam hadien ba kala don ka jingïashoh ïadat.

Naka liang katto katne ngut ki riew rangbah kila ïathuh ba haka por ba don kiba wan tah rong bad pyndam ïaki jingthoh ha kitei ki mawnongrim, ki pulit Assam ruh ki don hynrei kim shym la leh eiei bad ailad beit ïaki paidbah, bad dei hynnei ka step naka liang ki briew shnong kila leit ruh ban thoh dak biang ha kitei ki maw hynrei la mih pat ki briew bym ithuh naka jylla Assam kiba la sdang ban shoh ban dat pat ïaki da ki dieng ki siej watla ki pulit Assam ki don ha kato ka jaka ban pahara.

Naka liang ka seng FKJGP, North Khasi Hills District lem bad ka All Raid Marwet People Federation kila hiar sha katei ka jaka ban synran bad ai jingkyrshan ïaki paidbah ka shnong Maikhuli ban leit jurip ruh ïakitei ki maw nongrim kiba la shah pyndam bad ha kum katei ka por ruh ki briew naka jylla Assam ki la mih sha katei ka jaka ban pyneh beit triang bad ban kam trai ba katei ka jaka ka hap sha Assam kaba la mih ruh ka thma ktien kaba jur bad ki nongïalam ka FKJGP.

Haba kren sha ki lad pathai khubor naka liang u Bah Luistar Lyngdoh u la ong ba kum ka seng kala hiar sha katei ka jaka ban peit ïaka jinglong jingman, bad kum ka seng ka kwah ba ka shongsuk shongsaiñ ka dei ban don ha katei ka jaka namar ka dei ka kamram jong ka sorkar ban pynbeit ïaki kam kajia pud bad kane ka jaka ka dei hi kaba dang hap ha u pud u sam ka jylla Meghalaya kumba la sakhi ruh lyngba ka jingpyntreikam ïaka skhim MNREGA.

U la ong ruh ba kum ki paidbah ka thaiñ Shatei lam mihngi ngin tylli kum shipara bad ban nym pynmih kano kano ka huri hura namar ha kaba ïadei bad ki kam jaka puta ka dei ka sorkar kaba hap ban pynbeit bad kum ki paidbah kim dei ban pynmih kano kano ka huri hura bad kaba sngewsih ka long ba kiba sdang beit ban pynmih ka huri hura ki dei beit na Assam bad kyrpad ruh sha ka sorkar ba ka dei ban pynbeit mardor ïa kane ka kam naka bynta ka jingshngaiñ bad ka shongsuk ki paidbah.