Nongpoh, Risaw 24: Kawei ka kali i20 kaba don ïa u number ML 05 L 2837 kala kylla khongpong syndon ha surok bah mynta ka janmiet haduh ba ka iitkhmat jong katei ka kali kala pait bad pra syndon.

Katkum ka jingtip bala ioh lum la ong ba kane ka kali ka dang wan naki thaiñ Byrnihat ban kiew sha nongbah Shillong hynrei ynda poi sha Shangbangla u nongñiah katei ka kali um lah shuh ban tehlakam ïaka kali bad jam beit na shilliang sha shilliang surok bad tynrah ruh ïa u divider haduh ba katei ka kali kala kylla khongpong syndon hapdeng surok.

Shuh shuh la ioh jingtip ruh ki don 4 ngut kiba shong hapoh katei ka kali kynthup u nongñiah bad kila mynsaw malu mala.

Naka liang u SSP ka Ri-Bhoi u la hiar sha katei ka jaka katba u dang wanphai na Byrnihat hadien ka jingtalasi naphang ïaki trok kiba ieng beaiñ ha shilynter ka surokbah na Byrnihat sha Jorabat, bad ka jingtohkit halor katei ka jingjia ka dang ïaid shakhmat.