Mairang, Jymmang 22: Ka Dorbar Shnong Permadan, kaba la ialam da u Bah W. Sohlang, Sordar ka Shnong ha ryngkat ka jingsynran ki kynhun sengbhalang, mynta ka Sngi ki la leit ban kynduh bad phah jingthoh sha ka Anita Kharpor, Deputy Commissioner ka Eastern West Khasi Hills District, ban pynpaw sha ka kum ka khlieh jong ka Distrik, halor ka jingdonkam ka Distrik ban don noh ia ka Forensic Unit, nangta ka ophis DMHO bad ruh halor ka jingdonkam ban pynbun ia ka jingdon ki Pulit kynthei hapoh ka Distrik.
Haba ba la dep ban kynduh bad buh jingthoh sha ka DC, U Bah W.Sohlang, ula ong ba ka nongrim kaba la pynlong ia ka Dorbar Shnong ba kan leit kynduh DC ha ryngkat kaba buh jingthoh, na bynta ban dawa halor kitei ki jingdonkam hapoh ka Distrik, ka dei hadien ba la don ki jingjia ba sngewsih ha katei ka shnong bad kiba la jia la arsien kynthih, ha kaba tang namar ka jingbympoi kloi ki briew na ka tnat Forensic Unit ha ki jaka ba la jia ki jingjia ba sngesih, ka la buh jingeh ia ki bor pulit ha ka jingtohkit jong ki, na bynta ban lap ia ki sakhi satar bad ki sabut ba biang, namar kumba ka long mynta, lada jia eiei ha ki shnong kiba hap ha Eastern West, kaba mut hap ap beit haduh ban da poi ki Forensic Unit ba na Nongbah Shillong.
Shuh shuh, u Bah W. Sohlang, u la ong ruh, ba watla kum ka Distrik, ka la don la ka jong ka District Hospital na bynta ban leh ia ki Post Mortem, hynrei namar ka jingbymdon kiba la tbit ban leh ia ka Post Mortem, ka pynlong ia kiba bun ki Post Mortem ba hap ban leh sha Shillong, ha kaba ka la buh jingeh ia ki paidbah ha ka ba ki hap ban pyllut por ban leit ban wan sha Shillong lada jia kino kino ki jingjia.
Namarkata, lyngba katei ka jingleit kynduh ia ka DC, ngi la kyntu jur ia ka, ba ka dei ban kren sha ka sorkar halor ka jingdonkam kyrkieh ka tnat Forensic Unit, ka ophis DMHO bad ban pynbun ia ki Pulit kynthei hapoh ka Distrik, khnang ba kan long ka jingmyntoi ia ki paidbah ha ka Distrik bad haba don kino kino ki kam kiba iahap bad kitei ki tnat treikam sorkar.
Sa Peit Ruh