Nongpoh, Ïaiong 27: Ki nongïalam ka FKJGP Baridua Circle, kaba la ïalam da u Bah Micky Lyndem, Vice-President, nangta u Samla Starwell Majaw, Asst General Secretary lem bad u Sanju Shakwa, Organising Secretary, mynta ka sngi, ki la leit ban khynra ïa kawei ka Tapadar Gas Agency, kaba dei na ka jylla Assam bad kaba la wan pynïaid Gas beain da uwei u bar jylla hapoh ka shnong Baridua, Ri Bhoi.

Ha katei ka jingleit khynra ïa katei ka Gas Agency, kitei ki nongïalam ka FKJGP, kim shym la ioh ban kynduh ïa u trai uba pynïaid ïa katei ka dukan, namar ba u la phet tang mar ïa iohi ïa kitei ki nongïalam ka FKJGP.

Ka nongrim kaba la pynlong ïa kitei ki nongïalam ka FKJGP ban leit khynra ïa katei ka Gas agency, ka dei hadien ba ki la ioh shibun ki jingujor na ki paidbah nongshong shnong, kiba la pynpaw sha ki nongïalam ka seng halor ka jingdon katei ka jaka pynïaid Gas beain, ha kaba ki briew kiba don Card kim ioh Gas satia, hynrei la shu die ban sam beain sha ki briew kiba la leit ban thied ha ka dor kaba heh.

Hadien katei ka jingleit jurip, u Samla Starwell Majaw, u la ong ba kum ka seng ka pyrshah jur ïa katei ka dukan ba pynïaid Gas beain, ha kaba la pynïaid beain khlem ki kot ki sla kiba biang bad nalorkata ruh ka dei ban pynïaid tang ha jylla Assam, hynrei la wan pynïaid beain pat ha Meghalaya, nalorkata ka buh jingma ruh ïa ki riew paidbah bad khamtam eh ba ka dei kaba don hajan ka skul.

Haba ïadei bad ka jingdon katei ka dukan ba pynïaid Gas beain, na ka liang ka seng ka la kyntu ïa ki bor Distrik bad ïa ki Pulit Ri Bhoi, ba ki dei ban shimkhia bad ban khang khyrdep noh ïa katei ka dukan pynïaid Gas beain kaba don ha Baridua.