Khliehriat, Jylliew 26: Ban ïa tai sani halor ki jingeh jong ki nongri sniang ka East Jaintia Hills, ka Hill Farmer Union, East Jaintia Hills mynta ka sngi ka la pynlong syndon da ka jingïalang paidbah ki nongri sniang ba la pynlong ha Khliehriat West Community Hall.
Ha kane ka jingïalang, nalor ki nongri sniang la wan shim bynta lang ruh ka Kong Santa Maray Shylla MLA ka Sutnga Saipung Constituency, u Bah Pynshailang Masharing Social Secretary ka HFU Sengkmie, u Bah Danosha Tlang president ka HFU East Jaintia Hills, ki ophisar na ka tnad Animal Husbandry and veterinary lem bad kiwei kiwei de.
Ha kane ka jingïalang ki la ïa kren halor shibun ki mat ba ki nongri sniang ki kynduh jingeh kum ka jingkiew dor ki jingbam sniang, ki jingduna ioh jingïarap na ki skhim sorkar, ka jingpang bad ka jingïap ki sniang, ki jingdonkam pisa bad ka iew ka hat ba kum ka sorkar ka donkam ban phai khmat sha ki nongri sniang kiba ju shah ktah na ka por sha ka por.
Shuh shuh, kumba la kren da u Bah Pynshailang Masharing uba dei u Social Secretary ka HFU Sengkmie bad u Bah Danosha Tlang President ka HFU East Jaintia Hills, la ong ba ha kane ka jingïalang la ïa kren halor shibun ki jingeh ki nongri sniang nalor kitei kiba la pynpaw bad na ka liang jongki ruh ki la pynsngew sha katei ka Kong Santa Mary Shylla ba kum ka MLA ka hap ban rah sha ki skhor ka sorkar na ka bynta ban phai khmat kyrpang ne ban weng ïa ki jingeh jong ki nongri sniang ne ki nongrep ha katei ka District.
Sa peit ruh
