Mairang Lber 11: Na ka jingjia ba sngewsih kaba la jia ha ka shnong Langtor ba kawei ka Longkmie ka ba 26 snem ka rta bad I khun ba dang 2 bnai la suba ba ki la shah pyniap ha ki riew thrang snam, Ka Dorbar Shnong Langtor, ki paidbah, ki khynnah skul, ki nonghikai  ryngkat ki kynhun seng bhalang naduh ka Meghalaya Asha Worker union, HYC, HANM,HNYF, KSU bad FKJGP, mynta ka sngi ki la pynlong da ka jingiaid paidbah bad ka jingialang paidbah ban dawa ia ka jingbishar kaba hok halor ka jingshah pyniap katei ka Longkmie bad la I khun ba dang 2 bnai.
Ia kane ka jingiaid paidbah la sdang naduh ka shnong Krohbah bad pynkut ha ka Madan Shnong Langtor, ha kaba ki paidbah ryngkat ki seng bhalang ki la rah ia ka lama iong, ki placard bad ki banner ban pyrta bad ban dawa ia ka hok bad khamtam ban thwet ia kito ki runar kiba don kti bad ban pynshitom tyngeh katkum ki kyndon jong ka ain.
Kum ban pynkynmaw, ia ka met jong I Kong Darisha Lyngdoh bad I khun ba dang ar bnai la lap ha ka 2 tarik u Lber 2025 na kawei ka jaka pynlang um ha ka shnong Langtor bad dei na kane ka daw ka shnong, ki paidbah bad ki seng bhalang ki la hap ban mih madan ban pynrem jur halor kane ka jingjia kaba ym lah satia ban pdiang ha ka imlang ka sahlang bad ruh ba ki la dawa na ki bor ka ain ba dei ban leh da kaba tyngeh ia ki runar kiba don kti ha katei ka kam kaba beain.
Ki nongialam shnong, ki nongialam seng bhalang bad na ka kur Lyngdoh Kynshi ba kynthup naduh ka Kong Mira Jone Myrsing, Presidnt ka MAWU, Artis Ryntathiang president HANM EWKHD, Lambornes Basaiawmoit, GS HYC Mawthadraishan Circle,Robin Nongrem GS ka KSU Mairang Circle, S Kharbani Vice President FKJGP Eastern West zone haba ia jingkren ki la pynrem jur halor kane ka jingjia bad ki la dawa ruh na ki bor ka ain ba dei ban ai ia ka jingbishar kaba hok bad kito ki runar ba don kti ki dei ban shah pynshitom da kaba tyngeh katkum ki kyndon jong ka ain.
