Na ka daw ka jingjot jingpra ki surok, ka jingtwa kynroh bad ka jingsynjor ki Jingkieng Dieng ha shi lynter ka thaiñ Ranikor, kaba dei tang na ka daw ka jingiaid sahuh ki trok ba kit palat pud, ka KSU, Ranikor Circle, ha ka 9 tarik u Naitung 2024, ka pynbna paidbah syndon ba naduh ka 15 tarik u Naitung 2024 kan nym shah shuh ban iaid ki trok ba kit palat pud ban iaid lyngba ka ka surok Ranikor-Umpung bad kumjuh ka surok Ranikor-Mawkyrwat kaba hap iaid lyngba ka shnong Nongnah.
Kumba la pynpaw sha ki lad pathai khubor, u President ka KSU Ranikor Circle, u Samla Marconi Thongni, u la ong ba ka jingpynmih hukum u Deputy Commissioner ka South West Khasi Hills District lyngba ka kyndon aiñ 144 CrPC bad ruh ka jingleit buh ka tnad PWD ia ki signboard hakhmat jingkieng ban kit tang hapoh 9 ton, kim shym la treikam satia bad bun ki trok kiba la pynkheiñ ia katei ka kyndon da kaba bteng ia ka jingkit palat pud.
U Samla Marconi Thongni, u la pynpaw ruh da kaba ong, ba ka KSU ka khang pyrshah ban iaid ki trok ba kit tam pud, ka dei halor ka Nongrim, ba ka la don ka jingma na ka jingtwa ki kynroh bad ka jingsniew jong ka surok bad khamtam ruh ka jingma ia ki Jingkieng dieng kiba la synjor, kaba lah ban ktah ia ki paidbah.
Kum u nongiala, u la pynbna paidbah ruh ba naduh ka 15 tarik u Naitung, ka seng ka la rai ban peitngor bad ban khang pyrshah ia ki trok kit palat pud ban iaid lyngba kine ki surok bad ka seng kan pyntikna ba ia katei ka hukum u DC ka seng ka hap hi ban pyntreikam halor ka jingpynkhein aiñ kiba bun ki trok. Shuh shuh, u la ong ruh ba ka seng ka kyntu jur ia ki nongñiah trok ba kidei ban iatreilang bad ba kane ka long na ka bynta ka jingbit jingbiang u lang paitbah, u la bynrap.
