Nongpoh, Risaw 23: Ha ka jingkynjoh ia u Mawmer ba 3 snem ka jingiaid lynti, ka Umjerksiar Cluster Level Federation Women’s SHG Multipurpose Society Limited mynta ka sngi la rakhe lehkmen kyrpang ia kane ka jingiaid lynti ba 3 nsme da kaba ki la pynlong ia ka lympung ka jingiakynduh lang jong baroh ki Village Organization ki SHG ba la tip kum ka ‘1st Annual General Meeting 2024 ba la pynlong ha Madan Ialehkai ka Shnong Mawlyngkhung.
La sakhi lang ia kane ka sngi kyprang da ka jingdon lang U Bah Charles Marngar MLA/MDC Mawhati Constituency kum u Kongsan bad U Deputy Commissioner Ri Bhoi District U Abhilash Baranwal kum u Symbut Kongsan ha ka jingdon lang u BDO ka Umsning C&RD Block u Bah Andrew L Myrthong nalor kiwei ki heh Ophisar bad ki Longkmie jong ki SHG bapher bapher.
Kum ban pynkynmaw, ka Umjerksiar Cluster Level Federation Women’s SHG Multipurpose Society Ltd, Mawlyngkhung, Kadei kawei na ki kynhun Society jong ki Longkmie, kaba la long shisha ka jingkyrkhu kaba khraw sha kiba bun ki Longkmie jong ka Thiañ, ha kaba ki la ioh ia ka lad ka lynti ban ieng hala ki jong ki kti ban sengkam sengjam lade, lyngba da ka jingdon hapoh ki kynhun SHG bapher bapher kaba la kyrshan da ka Tnat C&RD Block lyngba ka Meghalaya State Livelihood Society,
Hakane ka Sngi la ioh ban ai ruh ia ka Kaiphot trei kam (Report) lyngba ka Kong Belinda Kynru kaba dei ka President jong ka Society, bad la pynkup burom kyrpang ruh ia ki SHG kiba la trei shitom bad kiba la pyndonkam hok ia ki lad jingiarap kaba ka Society ka la ia ki.
Haba pynpaw ia ka jingiaid lynti kane ka Society, la seng ia kane ka Umjerksiar Cluster Level Federation Women’s SHG Multipurpose Society Limited ha ka 9 Tarik Nailur 2022 bad hapoh kane ka lai snem kane ka Society ka la lah ban pyniar bad suhthied sha baroh ki shnong kiba hap hapoh ka jingpeit jingkhmih ka jong ka, kiba don haduh kumba 14 tylli bad haba kheiñ kyllum lang baroh ki SHG kiba don hapoh ki V.O jong kine ki 14 tylli ki shnong ki la don haduh kumba 127 tylli.
Dei lyngba ka jingsuhthied kane ka Society lyngba ki VO kala ai jingmyntoi shikatdei sha ki longkmie bad kumjuh sha ki khun samla kynthei kiba la kot sha ka 18 snem ka rta shaneng bad kumjuh lyngba ki V.O bad ki SHG kiba don hapoh kane ka Society, ba la wan rah ia ka jingmyntoi ha ka imlang ka sahlang ha ki shnong ki thaw ha ka liang ka shongsuk shongshngaiñ , ka khuid ka Suba khamtam ha ka jinglah ban rad diengkhong bad ban iada na ki jingsniew kiba lah ban pynjot ia ka imlang ka sahlang.
Ha kane ka sngi ba la rakhe ia kane ka jingiaid lynti ba la kot sha ka 3 snem kynthih, u Bah Charles Marngar bad U Deputy Commissioner u Abhilash Baranwal kum ki kongsan jong kane ka sngi, ki la ai kan jingiaroh ia ki nongialam bad ki dkhot jong kane ka Society kiba la trei shitom bad wanrah shisha ia ka jingmyntoi sha ki longkmie,ki khunsamla kynthei bad kumjuh ha ka imlang ka sahlang bad ki la kular ruh kin dang iai thaw lad thaw lynti ban pynioh shuh shuh ia ki lad jingiarap sha ka Society, sha ki VO bad ki SHG ba kin nang ioh bor shuh shuh ban nang trei kham bha na ka bynta ka imlang ka sahlang.
