Ki nongialam ka HYC Ri Bhoi, mynta ka sngi ki la hap ban leit mih sha Khanapara Police Station, hadien ba ki la shah khot hajir ha ki pulit, halor ka jingjia ba dang shu jia shen ha shnong 11 mer Mawsmai, Ri Bhoi, hadien ba ki nongïalam lem bad ki dkhot ka HYC ki la leit ban khynra Trading License ïa kawei ka Karkhana sain-jri ba la pyniaid da u wei u bar jylla ha shnong Mawsmai.
Kitei ki nongialam ka HYC Ri Bhoi bad kiba la shah khot hajir, ki kynthup ia u Bah Hercules Suting, President, u Bah Tony Shylla, General Secretary lem bad u Bah Shan Marwein dkhot ka sengkmie. Ha ka por ba kitei ki nongialam HYC Ri Bhoi, ki la leit sha Khanapara PS, la synran da ki nongialam ka HYC Sengkmie, kiba kynthup ia u Bah Gee Mawlong, Vice-President ka HYC Sengkmie lem bad ki nongialam bad dkhot ka HYC Ri Bhoi.
U Bah Hercules Suting, haba kren sha ki lad pathaikhubor, u la ong ba la khot hajir ia u ka dei halor ka ka jingjia ha ka por ba ki leit khynra Trading Licence ia kawei ka Karkhana sain-jri, kaba la pyniaid da u bar jylla kaba don ha 11mer Mawsmai.
Shuh shuh, u Bah Hercules Suting, u la iathuh ruh ba ma u lem bad ki arngut ki la shah pyngat haduh 6 tylli ki kyndon aiñ ha Khanapara Police Station.
U la ong ruh ba kum u nongialam ka HYC ha Ri Bhoi, um sngew eiei halor katei ka jingshah khot hajir ha ki Pulit, namar ba ma u lem bad ki dkhot ka seng, ki sngew ba kim shym la leh ia kaba bakla, hynrei ki la leit ban khynra Trading License, na ka bynta ban tip la utei u bar jylla uba pyniaid ia katei ka Karkhana sain-jri, ka dei kaba biang ia ki kot ki sla ne ka dei kaba la pyniaid beaiñ.
Namarkata, kumba u trai jong katei ka Karkhana sain jri, um shym la pyni ia kita ki kot ki sla kiba u donkam ban leh, na ka liang ka seng dawa na ka District Council ba kan leh tyngeh ia utei u bar jylla uba pyntrei ia katei ka Karkhana sainjri, namar ka seng hi kan ym shong thait, hynrei kan iai bteng ban khynra ia kiwei pat ki kam sengkam sengjam ne ki karkhana kiba la pyniaid da ki briew kiba nabar ka jylla.
