Namar ka jingsngewkhia halor ka jingbym long khuid halor ka jingthung kam kontrak na bynta ki nurse hapoh ka jylla Meghalaya, mynta ka 24 Naitung ka kynhun jong ki nongtrei Nurse ki leit ban ia kynduh ia ka Myntri ka tnad ka koit ka khiah ka Dr. Ampareen Lyngdoh ban aiti ruh da ka dorkhas halor kane ka mat.
Ha kane ka dorkhas ba aiti sha ka Myntri ka tnat ka koit ka khiah ki la pynpaw ia ka jingthrang jong ka kynhun ki Nurse ban pynduh pyndam noh ia ka jingpynbna (Advertisement) khot thep kam da kaba ki la pynpaw ba kam don ka jingleh khuid ha ka por ba ju pynlong ia ki eksam thepkam da ka tnat ka koit ka khiah ha ka jylla.
Ki la dawa ruh, ban pynlong noh ia ka jingthepkam kaba tikna ia ki Nurse kiba la shakri la bun snem ha ki jaka sumar sorkar ka jylla (Permanent) khnang ba ka lawei jong ki kan long kan long kaba shngain, bad la bynrap ruh ba ngi dawa ban thep kam katkum ka merit ban pyntikna ba kito kiba dei hok kin ioh ia la ka bynta kaba hok bad ba ka eksam ruh dei ban pyntikna ba kan long kaba khuid kaba suba da kaba pynbiang ia ki bor pahara bad nongpeit nongkhmieh kiba biang.
La kdew ruh, ba ia ki kyrteng jong kiba ioh bad ki bym ioh ia ka kam ha ryngkat ki marks ba shai dei ban pynbna paidbah ban tikna ka rukom thepkam kan long kaba khuid bad la dawa na ka Myntri ka tnad ka Koit ka Khiah ban pynsted noh ban pynbna ia ka result thep kam bad ruh ban pynjlan ia ka rta treikam bad ban pynphai ruh ia ka pisa jong kito kiba samla kiba la dep siew haka por ba thep ïa katei ka kam.
