Nongpoh,Nohprah 16: Ki Nongïalam ka Seng Samja Katholik Sub-District Nongpoh hapoh ka jingïalam u Samla Jona Ryntathiang kum u President lem bad ki dkhot, haka ka 14 tarik Nohprah ki la pynkut noh ïaka lympung ïa kynduh lang jong ki khun samla kaba dei ka sien nyngkong kaba la sdang naduh ka 13 tarik Nohprah ha Prish Hall, Nongpoh.
Ïa katei ka Lympung ïa kynduh lang ki khun samla ka balang Katholik Sub-District Nongpoh la wan ban pynhap da u MLA ka Nongpoh bah Mayralborn Syiem haka jingïasakhi lang u Bah Balajied Rani MDC Nongpoh, Brother Quirinus War, Sr. Magret kharmuti, Katekis Silarius Lyngdoh lem bad ki Nongialam ka Sub-District.
Kumban shu kdew hangne, Ka Seng Samla Katholik Sub-District Nongpoh kaba kdup pat ïaki 21 tylli ki balang shnong ka la sdang ban shim ïa kane ka sienjam haka sien kaba nyngkong eh daka jingthmu ban wan rah ïaka jingïatylli lang para samla hapoh ka Balang ban wan rah ïaka jingiadei kaba ïa jan ïaki samla bad ki kam jong ka Balang bad ha kajuh kapor ban ailad ruh ïaki khun samla ka Balang ban ïoh iaka lad ban ïa lehkmen lang haka kyrteng u Blei khnang ba kin nym sakhma ha kane ka rongphong pyrthei.
Ha kitei ki ar sngi, ka la don ka jingïakop bapher bapher naduh ka jingiakop pyni sap, ka jingiop kyntip ktien, ka jingiakop lehkai photbal, Mawpoiñ, bad kiwei kiwei bad Ha kaba kut jong katei ka lympung, Naka liang ki Nongïalam jong ka Seng Samla ki la sam ruh ïaki khusnam sha ki nongjop haka jingiakop bapher bapher kiba la ioh ban pynlong ha kitei ki ar sngi.
Na ka liang u MLA ka Nongppoh u Bah Mayralborn Syiem u la ai jingkren ha kane ka sngi da ki kyntiew sneng ki kyntien kraw ia baroh ki khun samla, ba ki dei ban shim ia kata ka jingkitkhlieh ym tang haka kam ka jong U Blei bad ki dei ruh ban kitkhlieh ia ka imlang ka sahlang. Kane ka jingpynlong ia kane ka lympung ka dei ka dak kaba ki wan rah ia ka jingiatylli hapoh ka Balang bad kumjuh ruh kim khun samla ka Balang kin don lang ka jingkitkhlieh ban shakri ne trei na ka bynta ka bha ka miat jong ka imlang ka sahlang, u la bynrap.
